Сејдини: Успехот не се постигнува преку ноќ, се создава нова генерација на која ѝ треба поддршка

Фудбалската селекција на Македонија вечерва по третпат во период од осумнаесет месеци ќе се сретне со европскиот шампион Италија. По историската победа во Палермо и ремито во Скопје, нашите избраници одново ќе се обидат да ѝ ги помрсат сметките на една од најдобрите селекции на планетата.

Во пресрет на овој натпревар, првиот човек на Фудбалската федерација на Македонија, Муамед Сејдини, испрати порака на социјалните мрежи, во која побара поддршка за фудбалерите и да им се даде крилја да можат да нè радуваат со нови успеси.

„Овие квалификации за пласман на континенталниот самит потврдија дека фудбалот, навистина е игра која буди најмногу емоции. Одигравме одлични натпревари против силни претставници во групата. Во период од 18 месеци ова е трет дуел против актуелниот европски првак. И ретко кој може да се пофали со позитивен биланс со Италија како што можеме ние. Но ова не беше доволно за пласман на првите две позиции. Успехот не се постигнува преку ноќ, се создава нова генерација која има многу амбиции и самодоверба за големи резултати во иднина. За мене сега ова е врвен приоритет, да помогнеме заедно да ги постигнеме целите и да им дадеме крилја на младите момци од секој аспект за да можат да нè израдуваат со нивните успеси сите заедно“, напиша Сејдини.

Натпреварот меѓу Италија и Македонија се игра вечерва во Рим, со почеток од 20:45 часот.