Саутгејт конечно го погоди офанзивното трио, Американците со победа до осминафинале (Видео)

Маркус Рашфорд и Фил Фоден добија шанса од стартот на дуелот меѓу Англија и Велс и со своите голови го потврдија првото место во групата на селекцијата предводена од Герет Саутгејт.

Англискиот селектор конечно ги промени крилните напаѓачи, па Рашфорд со два и Фоден со еден гол се покажаа како одлично друштво за Хари Кејн, кој рано беше повлечен од игра.

Рашфорд го отвори резултатот со гол од слободен удар во 50. минута, а две минути подоцна Фоден го зголеми водството на асистенција на Кејн. Конечните 3:0 ги постави Рашфорд во 68. минута.

На вториот натпревар, Соединетите Американски Држави го победија Иран со 1:0, а решавачкиот момент беше голот на Пулишич во 38. минута.

Според резултатите, Англија во осминафиналето ќе се сретне со Сенегал, додека Американците одат на дуел со Холандија.