Сари без влакна на јазикот: Ако вака губиме од Лече, тогаш…

Составот на Лацио лошо ја отвори 2023 година и тоа со пораз од Лече на „Виа Дел Маре“ од 2-1.

Лацијалите водеа со 1-0 по првото полувреме со погодокот на Чиро Имобиле, меѓутоа по паузата се „изгубија“, домаќинот успеа да направи комплетен пресврт и ги освои трите бода.

Сосема очекувано разочан од прикажаното и од поразот беше тренерот Маурицио Сари кој како главен проблем на неговиот тим го посочи менталитетот.

-Беше неверојатен натпревар затоа што игравме на многу високо ниво 30 минути, креиравме многу шанси и многу малку му дозволивме на Лече. Меѓутоа по паузата целосно се загубивме и лесно би било да се каже дека не сме физички подготвени. Тоа е само алиби – ние се исклучивме и му го препуштивме мечот на противникот.

-Има проблем со менталитетот во Лацио и тоа успевавме да го држиме под контрола во поголем дел од сезоната, но денеска повторно се појави. Ако вака губиме од Лече, тогаш очигледно сме инфериорни во однос на нивото на кое мислевме дека сме. Тоа не е тактичко прашање, се работи за работа на 25 глави, -порача Сари без влакна на јазикот.

Лацио во следното коло ќе го пречекаат Емполи.