Сантош: Реков дека овој тим на Македонија знае да игра фудбал

30.03.2022 Mart Sreda

Фернандо Сантош остана доследен на своите најави и можеше мирно да се соочи со португалските новинари, на кои пред неколку месеци им вети дека Португалија ќе игра на Светското првенство и покрај шокантниот пораз од Србија на домашен терен.

Србите славеа на гостувањето кај фаворитот и го испратија во бараж завршница за пласман на мундијалот, во која за жал Португалците беа поуспешни од храбрите избраници на Благоја Милевски кои ја оставија душата и срцето на теренот на „Драгао“.

Поквалитетната и поискусна репрезентација на крајот славеше со 2:0 благодарение на двата гола на Бруно Фернандеш, а Сантош во својата прва анализа за триумфот говореше за критиките кои ги доби по поразот од Србија, но и за триумфот остварен над Македонија.

– Имав чиста совест и бев мирен како и секогаш после сите критики. Верував дека овој тим ќе оди на Светско првенство и еве сега сме таму кадешто ви реков дека ќе бидеме.

– Сакам да им честитам на фудбалерите за извонредниот пристап кој го имаа. Во првите 10 минути не ни беше воопшто лесно, не бевме добри, но веќе реков дека овој тим на Македонија знае како да игра. Не очекувавме да излезат така, но овој тим докажа дека има дух и со поддршката од публиката беше полесно. Мислам дека остваривме заслужена победа, не се сеќавам да имаа некоја шанса за гол, а ние создадовме доста прилики. Заслуживме да играме Светско првенство, вистинска среќа е што сите Португалци ќе можат да уживаат во мундијалот на крајот на оваа година, – изјави Сантош.