Сан Антонио остана без двајца стартери до крајот на сезоната

02.04.2024 April Vtornik

Екипата на Сан Антонио бргу ќе ја остави зад себе сезоната во која младиот тим на Грег Попович доби шанса за воиггрување, а Виктор Вембанјама игра солидна дебитантска сезона која го потврди неговиот голем потенцијал.

За ситуацијата да биде уште покомплицирана во завршниот период од регуларниот дел, Попович до крајот на сезоната нема да смета на Девин Васел и Џереми Сохан.

Васел го пропушти дуелот со Голден Стејт и подоцна направил детални прегледи, па му бил утврден проблем на десното стопало, додека Сохан се повреди уште на дуелот со Њујорк.

По неколку консултации, клубот и кошаркарот решиле дека е најдобро да биде направен оперативен зафат за санирање на проблемот на левиот скочен зглоб на Сохан.

Васел ја играше најдобрата сезона во НБА со просек од 19,5 поени, а Спарс со него и Вембанјама добија и одличен нов офанзивен тандем. Напредок во својата втора сезона забележа и Сохан, кој играше без пауза до повредата, а стигна до просечни 11,4 поени по натпревар.