Рускиот режисер кој снимаше во вселената вели следна дестинација е Месечината или Марс

20.10.2021 Oktomvri Sreda

Рускиот режисер Клим Шипенко изјави дека е подготвен да снима филм на Месечината, па дури и на Марс, откако се врати од 12-дневниот престој на Меѓународната вселенска станица каде што се снимаа сцени за првиот филм во орбита. Шипенко и актерката Јулија Пересилд се вратија на Земјата во неделата откако собраа повеќе од 30 часа материјал за „Предизвик“, прогласен за прв вселенски филм, а руските медиуми го поздравија како светско достигнување. Прашан за можно продолжение на Месечината, Шипенко на прес-конференција рече: „Подготвени сме. Веруваме дека вселенскиот филм треба да се снима во вселената. Ако станува збор за Месечината, ќе одиме на Месечината, ако е Марс, одиме на Марс.“ „Зошто да не? Зошто еден филм треба да се снима во студио? ” Руските државни медиуми обезбедија целосно покривање на космичкиот филмски потфат, наслонувајќи се на убава приказна во време кога деловните титани Илон Маск и Џеф Безос се на насловните страници на светските медиуми со лансирање сопствени ракети, а самата руска вселенска програма претрпе одложувања, дефекти и корупциски скандали, пишува „Ројтерс“. „Секоја секунда беше големо откритие“, рече Пересилд, која во филмот глуми лекарка која треба да отпатува до вселенската станица (ИСС) за да го спаси животот на еден космонаут.