Русија им нуди бесплатни парцели на граѓаните во арктичкиот регион

Руските власти на своите граѓани им нудат бесплатно земјиште на Арктикот, охрабрувајќи ги да ги искористат климатските промени, пишува британски „Телеграф“.

Климатските промени поттикнаа трансформација на животот на далечниот исток и северот на Русија. Тој поларен регион се загрева двојно побрзо од остатокот од светот, па топењето на мразот отвора нови можности на граѓаните за развој на екотуризмот и малите и средни претпријатија.

Илјадници Руси поднеле барање за милион хектари тековно достапно земјиште. Како што се зголемуваат температурите, земјата станува подостапна и се нудат многу можности.

Научниците проценуваат дека огромни делови од вечниот мраз во северна Русија се изложени на ризик од брзо топење, а мочуриштата и езерата растат како печурки во регионот.

– Арктикот е поинаков. Има места за еколошка рекреација, на пример, во Карелија и регионот Мурманск, за туризам и развој на мали и средни претпријатија – рече Алексеј Чекунков, министер за развој на далечниот исток.

Екотуризмот стана двигател на туристичката индустрија во Русија па според експертите има потенцијал да стане еден од лидерите во светот.

– Еколошките форми на туризам се развиваат многу динамично, бележиме годишен раст меѓу 25 и 30 проценти. Се зголемува бројот на љубители на екотуризмот, а туристите се помлади. Огромен е бројот на млади кои сакаат да одат на природа. Тие дури претпочитаат ваков тип на рекреација отколку патување во тропските предели – изјави директорката на Федералната агенција за туризам на Русија, Зарина Догузова.

Се создаваат нови патеки во природните резервати и националните паркови со цел да се зачува животната средина и да се привлечат повеќе посетители. Според новата шема, парцелите се достапни во регионот Мурманск, автономниот округ Ненец, автономниот округ Јамало-Ненец, Република Карелија, Република Коми и регионот Архангелск.

Најбараните парцели се во регионот Мурманск, за кои апликација поднеле повеќе од 2.400 руски граѓани, а потоа во регионот Архангелск, за кој се заинтересирани 883 лица.