Ристовски си замина од Вардар: Решив да се посветам на доброто за целиот спорт

20.06.2024 Juni Cetvrtok

Борко Ристовски стави крај на играчката кариера пред една година и реши да преземе многу значајна улога во Вардар, каде изминативе 12 месеци ја извршуваше функцијата на Извршен директор.

Поранешниот репрезентативен голман беше одговорен за сите најважни операции кои ги имаше тимот при составувањето на играчкиот кадар, но поради новиот предлог да биде Миниестер за спорт од новата Влада, Ристовски денеска ја информираше јавноста дека нема да може напоредно да ја извршува досегашната улога во саканиот клуб.

– Почитувани спортски пријатели, уште една сезона е зад нас во која успеавме да направиме многу позитивни работи. Успеавме да го стабилизираме нашиот РК Вардар, да се вратиме едно скалило повисоко во однос на лани, и милиметри недостасуваа да бидеме на највисокото скалило. Горд сум што како дел од тимот и негов Извршен директор, направиме екипа која има квалитет, капацитет и добра хемија, потребни за остварување на резултати. Што го направивме Вардар пак да е фактор, и клуб кој е секогаш за врвни дострели.

– Сигурно можевме и повеќе, и требаше да бидеме уште некој чекор понапред. Во спортот не може ништо да се планира однапред, но со добро организирање, тренирање и пред се силна волја секогаш се стигнува онаму каде сте тргнале. А ние тргнавме по патеки кои ни носат добри резултати. Успешно ги надминувавме и ги решававаме сите предизвици пред нас.

– Професионалниот ангажман секогаш ви носи нови предизвици во кои влегувате, со идеја нешто да подобрите, да смените, да се борите за своите идеали и цели. РК Вардар ми овозможи да работам на тоа поле, и да размислувам за подобри услови, во клубот, но и за сите спортисти, и за сите клубови. Нешто што ни недостасува во спортот во целина. Подобри услови, повеќе спортисти, создавање идни горди ѕвезди и репрезентативци на Македонија.

Бидејќи прифатив да работам на тоа, и сум предложен за иден Министер за спорт во Владата на Република Македонија, сметам дека мојата идна функција и сегашната не можат да се спојат.

– РК Вардар ќе остане во моето срце како клуб кој многу ми дал. Останувам да навивам за мојот Вардар, но, решив да се посветам на доброто на целиот спорт, на секој клуб, на секој спортист. Затоа во иднина се повлекувам од функцијата Извршен директор на РК Вардар која со љубов, желба и посветеност ја работев.

Убеден сум дека има многу квалитетни луѓе кои ќе го продолжат она што го почнавме и ќе продолжат уште појако. А јас ќе продолжам да бидам на страната на спортот, на сите клубови, на сите спортисти, и ќе се борам да ги добијат најдобрите услови за работа и да бидат горди претставници на својата Македонија. Останувам отворен за секој дијалог, секој разговор, за се што е во интересен на македонскиот спорт, – гласи објавата на Ристовски на „Фејсбук“.