„Реј-бан“ и „Мета“ ги претставија новите паметни очила

„Мета конект“ (поранешен „Фејсбук“) официјално го објави лансирањето на својата мошне очекувана колекција на паметни очила „реј-бан мета“. Оваа најнова генерација на паметни очила може да се пофали со голем број импресивни подобрувања и возбудливи карактеристики.

Колекцијата паметни очила „реј-бан мета“ претставува значаен чекор напред во технологијата за паметни очила. Надоврзувајќи се на успехот на својата прва генерација паметни очила, „Мета конект“ ги зеде предвид повратните информации од корисниците, што резултира со производ што е многу „побогат“ од својот претходник.

Паметните очила „реј-бан мета“ ве ослободуваат од ограничувањата на рачните камери. Тие ви дозволуваат да снимите фотографија или видеоклип од вашата единствена гледна точка, овозможувајќи ви не само да го доживеете моментот туку всушност да живеете во моментот, стои во описот на очилата.

Опремени со специјално дизајнирани звучници, овие очила нудат продолжен бас, поголема максимална јачина на звукот и подобрен насочен звук. Тоа резултира со намалено „истекување“ на звукот за подобар квалитет на повикот, музика дури и во бучни средини. Низа од пет микрофони поддржува импресивно аудиоснимање, снимајќи звуци од сите правци за време на снимањето видео.

Новата ултраширока камера од 12 мегапиксели обезбедува поквалитетни фотографии и видеа од 1.080п во траење до 60 секунди. Едноставната гласовна команда им овозможува на корисниците да споделуваат фотографии директно со пријателите и со семејството. Корисниците ќе можат и директно да се вклучуваат на Фејсбук или Инстаграм и да комуницираат со својата публика слушајќи коментари низ очилата.

Очилата имаат интегрирана вештачка интелигенција Мета, оптимизирана за искуства без раце во движење. Корисниците можат да комуницираат со АИ Мета користејќи гласовни команди, поттикнувајќи ја креативноста, за лесно да пристапуваат до информации и да контролираат функции.