Промоција на книгата „Кабинет на чуда со ѕидови од огледала“

Во книжарницата „Буква“, на 20 септември, во 19:30 часот ќе се одржи промоција на книгата „Кабинет на чуда со ѕидови од огледала“ и разговор со авторите Влада Урошевиќ и Владимир Јанковски. Промоторка на книгата ќе биде Оливера Ќорвезироска.

„Кабинет на чуда со ѕидови од огледала“ ги содржи разговорите што Влада Урошевиќ и Владимир Јанковски ги воделе во временски опсег поголем од дваесет години. Првиот дел од книгата, „Огледало за загатката“, опфаќа дијалози водени во 2002 и 2003 година, вториот претставува еден подолг разговор од 2015 година, а последниот дел, „Кабинет на чуда“, разговори од 2023 година.

На овие страници се допрени најголемиот дел од творечките преокупации на Урошевиќ, а авторот се обидува преку дијалогот за поетиката на писателот да долови и елементи од неговата личност, живот и односот кон современиците. Книгата може да се чита и како панорама на книжевните опсесии на Урошевиќ и како портрет на еден човек кој својата егзистенција нераскинливо ја преплетувал со книжевноста и, воопшто, со уметноста.