Пролетно разигрување во Кинотеката

01.04.2024 April Ponedelnik

Временската машина стигна до април. Kинотеката реши својот филмски воз да содржи киноприказни од различни жанрови, од различни земји, од различни континенти, со различен датум на создавање.Повторно продолжуваат филмовите од серијалот „Лауреатите на Манаки“ и веќе востановените денови на одредена кинематографија.За човечката психа говори филмот што оди потоа – „Лолита“. Но не култниот црно-бел филм на Кјубрик, туку римејкот во боја од 1990-тите години, снимен од режисерот Адријан Лин. „Лолита“ е мисловно истражување на темните аспекти на човековата природа. Лин не бега од непријатните вистини прикажани во романот на Владимир Набоков, предизвикувајќи ја публиката да се бори со сопствените перцепции за љубовта, моралот и моќта. Улогите на Џереми Ајронс како Хамберт Хамберт и на Доминик Свејн како Лолита им носат сложеност и длабочина на ликовите.Со возбудувања од психолошка природа, се продолжува со „Паразит“, еден од најзборуваните и најнаградувани филмови во последните десет години. Во 2019 година филмот ја освои „златната палма“ на Канскиот филмски фестивал, како првиот јужнокорејски филм што се закитил со оваа награда, а наедно е и добитник на „оскар“ за најдобар филм, со што стана првиот филм од неанглиско говорно подрачје што освоил „оскар“ за најдобар филм и го зацементира Бонг Џунг Хо како еден од најдобрите современи режисери.На ова одлично се надоврзуваат филмовите што следуваат. Култни филмови од крајот на 1990-тите и почетокот на 2000-тите. Во овој тематски блок ќе бидат прикажани „Мементо“, „Трчај, Лола, трчај“, „21 грам“.Во продолжението на месецот, Кинотеката ќе им понуди на гледачите три долгометражни филма во рамките на познатите и ценети денови овој пат на соседната, грчка кинематографија.

– Уште еден редовен циклус проекции, потсетувања на лауератите на нашиот, а светски познат и признаен фестивал на филмската камера „Браќа Манаки“. Во април вниманието ќе го предизвика славниот „Амадеус“ од 1984 година, еден од најдобрите филмови на големиот чешки и американски режисер Милош Форман. Филмот е адаптација на истоимената театарска претстава и големиот бродвејски хит на Питер Шефер.И овој месец нема да изостанат проекциите на краткометражни македонски филмови потпишани од автори и авторки од различни генерации – Афродита Марковиќ, Александар Ѓурчинов, Кристијан Ристески, Марија Апчевска.Во наредната содржина филмофилите ќе имаат можност, и тоа премиерно, на големото платно во Кинотеката да ги видат филмовите номинирани за „оскар“ „Анатомија на падот, по сценарио и режија на Жастин Триет, и „Јас, капетан“, во режија на Матео Гароне – информираат од Кинотеката.За почит и за внимание е концептот „Разлики што нè обединуваат“. Тоа е, всушност, наслов за многу важна и повеќе од потребна практика, за запознавање и вмрежување на филмолозите од регионов. Во рамките на овој нов концепт ќе се одбележи дваесетгодишнината од премиерата на „Големата вода“, во режија на Иво Трајков и по сценарио на Владимир Блажевски.Кинотеката потоа се враќа во 1976 година, кога е снимен албанскиот филм „Црвените булки над ѕидовите“, во режија на Димитер Анагности. Во 1980 година филмот го добива гранприто на Mеѓународниот филмски фестивал во Белград.На крајот на месецов е „400 удари“, легендарниот дебитантски филм на режисерот, сценарист и филмски критичар Франсоа Трифо.С.Ј.