Прво место за пејачката група „Сава Михајлов“ од Гевгелија на 15. фестивал „Пеј, срце“ во Ќустендил

На сцената пред Центарот на заедницата „Братство 1869“ во Ќустендил, на 10 и 11 септември 2022 година, петнаесетта година по ред, се одржа Меѓународниот натпревар за шлагерска и за староградска песна „Пеј, срце“. Во конкуренција на над 70 групи од Бугарија, Србија и од Македонија, првата награда отиде во рацете на пејачката група при Здружението на пензионери од Гевгелија „Сава Михајлов“. Тие настапија пред многубројната публика со песните „Сношти сакав да ти дојдам“, „Ој ти, моме, лудо ли си“ и „На срце ми стар мерак лежи“, со што ја покажаа целата убавина на македонската староградска песна.

Натпреварот го организираат Центарот на заедницата „Братство 1869“ и Општина Ќустендил, под покровителство на градоначалникот, г. Петар Паунов. Коорганизатор е центарот на заедницата „Пробуда 1961“.

Во неделата, на вториот ден од фестивалот, во 12 часот, сите учесници и гости заедно ги изведоа песните „Море пиле, славеј пиле“ и „Брала мома капини“.

– Ние, организаторите, си поставивме цел да ги зачуваме и да ги популаризираме песните на десетици генерации, да ги оживееме за нов живот и да ги вклучиме младите во нивните текстови и убавина, бидејќи популарната стара урбана песна во себе го носи единственото чувство на копнеж и на хармонија. Во последниве години се изведуваат од сè повеќе млади луѓе – изјавија организаторите по доделувањето на наградите.

Натпреварот во Ќустендил се етаблира како форум кој обезбедува платформа за бендови и за уметници од целата земја и од странство да го презентираат богатството на шлагерската и на староградската песна.