Почна обновата на старото училиште: Центарот за македонски јазик во Љубојно ќе биде завршен до крајот на 2025

19.03.2024 Mart Vtornik

„Центарот за македонски јазик ќе биде наш заеднички паметник, за кој до крајот на наредната 2025 година со задоволство ќе речеме: ‘Аманетот го исполнивме’“, рече министерката за култура, Бисера Костадиновска-Стојчевска, при вчерашната посета на старото училиште „Димитар Влахов“ во Љубојно. За негова реконструкција и комплетна адаптација во центар за промоција на македонскиот јазик, од буџетот на Министерството за култура во 2024 и во 2025 година ќе бидат издвоени 32,8 милиони денари

Старото и руинирано училиште во Љубојно до крајот на 2025 ќе биде реконструирано и адаптирано во центар за промоција на македонскиот јазик. Ова го најави министерката за култура, Бисера Костадиновска-Стојчевска, која вчера, заедно со Елена Јованова-Грујовска, директорка на Институтот за македонски јазик „Крсте Мисирков“ и проф. д-р Елизабета Бандиловска, член на Советот за македонски јазик, го посетија објектот во кој на 15 ноември 1945 година е одржан првиот час на македонски јазик. Иницијативата за негова реконструкција и адаптација во центар за промоција на македонскиот јазик е на Заводот за заштита на спомениците на културата и музеј Битола.

Според Костадиновска-Стојчевска, во изминатиот период, стручните тимови од оваа установа работеле со надлежните институции на реализирање на неопходните чекори за остварување на визијата за модерен центар за промоција на Љубојно, на Преспа и на македонскиот јазик и идентитет.

„Со изградба на центарот за промоција на македонскиот јазик, ја искажуваме нашата почит кон сите учители и ученици што се образовале на ова место, уште од крајот на 19 и почетокот на 20 век. Го исполнуваме долгот за зачувување и на архитектонското наследство што, како вреднос,т го има ова старо училиште во историјата на македонската уметност, како и долгот кон просветителската и општествената улога што ги има училиштето за едукација на македонскиот народ“, истакна министерката Костадиновска- Стојчевска.

Владата, на седница во јануари лани, донесе одлука старото училиште „Димитар Влахов“ во селото Љубојно да се адаптира во центар за промоција на македонскиот јазик.

„По завршувањето на сите неопходни постапки и обезбедени дозволи, убавото време ни овозможува да започнеме со работа и реализација на овој проект, кој е од исклучително национално значење. Во овој момент, се вршат подготвителните работи, а веќе од следната недела се започнува со поинтензивна работа, согласно со предвидениот план и динамика. Владата, преку Министерството за култура, обезбеди финансиски средства за реконструкција на овој објект, кој претставува интегрален дел на заштитената споменичка целина – с. Љубојно“, посочуваат од Заводот и музеј Битола.

Министерката Костадиновска-Стојчевска потсети дека проектот почнал со прогласување на селото Љубојно за заштитна споменична целина, по што биле изработени сите елаборати и проекти за да се добие градежна дозвола и за да може да почне градбата.

„Центарот за македонски јазик ќе биде наш заеднички паметник, за кој до крајот на наредната 2025 година со задоволство ќе речеме: ‘Аманетот го исполнивме’“, рече Костадиновска-Стојчевска.

Директорката на Институтот за македонски јазик, проф. д-р Елена Јованова-Грујовска, пак, кажа: „Очекувам возобновениот центар за промоција на македонскиот јазик да e место кое ќе го посетуваат младите луѓе од дијаспората, кои ќе го изучуваат македонскиот јазик. Но, очекувам овој центар да изврши голема улога и во зајакнувањето на билатералните и на трилатералните односи со соседните држави, Албанија и Грција, да биде мост што ќе ги обединува овие три држави“.

За реконструкција на старото училиште „Димитар Влахов“ во Љубојно и за негова комплетна адаптација во центар за промоција на македонскиот јазик, од буџетот на Министерството за култура во 2024 и во 2025 година ќе бидат издвоени 32,8 милиони денари. (Д.Т.)