Почина Лиза Мари Присли, ќерката на Елвис Присли

Лиза Мари Присли, ќерката на Елвис Присли, почина на 54-годишна возраст по доживеан тежок срцев удар во нејзиниот дом. Веста за нејзината смрт дојде само неколку часа по веста дека е примена во болница. Според ТМЗ, болничарите се обиделе да ја реанимираат во нејзиниот дом, а неколкупати се обиделе да ја оживеат на пат кон болницата, каде што таа починала. Веста за нејзината смрт ја потврди и мајка ѝ, Присила Присли. „Со тешко срце морам да ја споделам тажната вест дека мојата прекрасна ќерка Лиза Мари нè остави. Таа беше најстрасната, најсилната, највљубената жена што некогаш сум ја сретнала. Бараме приватност додека се обидуваме да се справиме со оваа тешка загуба. Ви благодариме за љубовта и за молитвите. Во овој момент нема да има дополнителни коментари“, рече Присила Инаку, Лиза во вторникот беше на доделувањето на „Златните глобуси“. Таа и мајка ѝ беа присутни за да го поддржат Остин Батлер, кој освои „Глобус“ за неговиот портрет на Елвис Присли. Лиза Мари е родена 1968 година и е сопственик на замокот на својот татко „Грејсленд“ во Мемфис, популарна туристичка атракција. Таа имала девет години кога Елвис починал од срцев удар. Нејзината музичка кариера ѝ почна со деби-албум To Whom It May Concern во 2003 година. Потоа следуваше Now What во 2005 година, од кои и двата стигнаа до топ-10 на „Билборд 200“. Третиот албум, Storm and Grace, беше објавен во 2012 година.