Почина кралот на ромската музика Ферус Мустафов

Почина кралот на ромската музика Ферус МустафовСвиреше на 13 инструменти, труба, саксофон, гајда, зурла, шупелка…По кратко боледување, почина кралот на ромската музика Ферус Мустафов. Веста за неговата смрт вчера ја објавија и членовите на неговото семејство. Ферус Мустафов беше примен во ГОБ „8 Септември“, каде што се бореше за својот живот и беше со влошено здравје. Пријателите, колегите и фамилијата почнаа да се простуваат од него на социјалните мрежи. Погребот ќе биде во Штип, каде што е роден.

Ферус Мустафов е роден на 20 декември 1950 година, потекнува од ромско семејство на музичари и е син на Илми Јашаров. Неговата професионална кариера започнала на седумнаесетгодишна возраст, додека студирал виолина и кларинет во локална музичка академија. За тоа време, тој бил поканет да оди на турнеја со бенд предводен од Тома Чрчев, а успехот на турнејата го натерал да се откаже од академското учење за да стане музичар.

По една година воена служба, за време на која тој ја воспоставил својата репутација играјќи на вечерни танци, се преселил во Сараево (БиХ), каде што ја презел водечката улога во експлозијата на популарноста на народната музика што се случила таму во тоа време.

Подоцна станал директор за музичко програмирање на ромски јазик на РТ Скопје и се стекнал со меѓународна публика преку изданијата на албумите на светските музички записи, како што се „Глобус стил“ и „Тропски“.

Настапувал во голем број земји во светот и снимил десетина албуми, главно со инструментални композиции. Тој е најпознатиот македонски кларинетист и саксофонист, кралот на ромската музика. Имал безброј турнеи по барање на иселениците. На репертоарот доминирале познати хитови на Ферус.

– Публиката најмногу се „пали“ кога ја свирам „Дада Сали“. Свири ора, чочеци… „Елено, моме“ и „Пајдушко“ ги има на секојдневното „мени“ на Ферус – изјави тој во една пригода.

Само во САД имаше три турнеи.

– Јас не свирам само ромска музика. Како што велиме – азбучно од А до Ш. Свириме и за Роми, и за Турци, и за Албанци, и за Македонци, и за Срби, и за Бугари, и за Грци. Со еден збор, свириме за сите – со насмевка изјави неуморниот Ферус по повод последната американска турнеја.

Свиреше на 13 инструменти, труба, саксофон, гајда, зурла, шупелка… Како дете почнал да свири на виолина, иако изјави дека немал мерак за тој инструмент.

Во едно од интервјуата за „Нова Македонија“, Петер Барбарич, музички новинар од Словенија, зборува за соработката со Ферус Мустафов.

– Го добив телефонскиот број на Ферус Мустафов преку дискографската куќа ПГП РТБ, со која соработуваше. Тоа беше во 1991 година. Се сеќавам на првата средба, бевме договорени во 11 часот, а тој се појави во 15 часот, со кожена јакна и со темни очила, и со кабриолет ме возеше низ Шутка. Јас бев шокиран, иако претходно ги гледав филмовите на Костурица, но тоа не беше филм. Истата година тој свиреше во Љубљана, на „Крижанки“, пред 1.000 луѓе на фестивалот „Друга годба“. Неговиот настап го сними ТВ Словенија и досега е емитуван барем 20 пати, а и јас сѐ уште ја чувам радиоснимката. На истата сцена настапи и во 1993 година. Ферус е одличен музичар, расположен за импровизација, со акробатски начин на свирење. Потоа, јас го промовирав низ Европа, а некаде во тоа време се формираше и светската музичка сцена и почна да се одржува „Вомекс“, првиот светски фестивал на етномузика. Во 1994 г., Ферус дојде на фестивал во Берлин и сними албум за британската дискографска куќа „Блог стар“, кој се продаваше во продавниците на „Сони“ и „Вирџин“ во Њујорк. Тоа беше единствен носач на звук од Македонија, заедно со оние на Есма и на „Анастасија“. Ферус имаше успешна турнеја по Западна Европа, а во 1995 г. и одлични настапи во Грција. Соработувавме до 2002 година. Како најквалитетни би ги издвоил неговите настапи со Милан Завков и Кочо Агушев, обединети како „Балкан кингс“ – се сеќава словенечкиот новинар.