Портланд вторпат победник на Летната лига на НБА

КОШАРКА

Последните шест натпревари од Летната лига на НБА во кошарка, во Лас Вегас, завршија во неделата, а Портланд го освои шампионатот со победата над Њујорк никс со 85-77. Трендон Ватфорд од Портланд едногласно е избран за МВП (најкорисен кошаркар). Летната лига е официјално натпреварување на НБА надвор од сезоната, кога тимовите испробуваат различни летни состави наместо нивните редовни тимови што играат во редовната сезона. Портланд беше победник на Летната лига на НБА и во 2018 година, а победници биле и, на пример, Сакраменто (во 2014 и во 2021 година), Мемфис (2019), Лос Анџелес лејкерс (2017), Чикаго (2016), Сан Антонио (2015), Голден стејт (2013) итн. Летната лига не се играше во 2020 година поради пандемијата на коронавирусот. И годинава во Летната лига учествуваа сите 30 НБА-екипи, сите играа вкупно по пет меча, а по четири средби најдобрите две на табелата играа за титулата. Портланд на патот до трофејот во првите четири меча ги победи Њу Орлеанс, Њујорк никс и Хјустон, а загуби од Детроит. Пред почетокот на официјалната Летна лига на НБА се играа и летните лиги на Солт лејк сити седми пат (победи Мемфис, а играа и Солт лејк сити, Оклахома и Филаделфија) итн., Калифорнија класик четврти пат (славеше Сакраменто, а настапија и Голден стејт, Лос Анџелес лејкерс и Мајами).