Повторно Гевгелиски детски музички бренд – „Калинка 2023“ – Општината ќе го финансира со 500 илјади

Постхумно ќе биде доделена Специјална награда за еден од основачите на фестивалот, на Ѓорги Цуклевски. Наградата за Трајни вредности!

По неколкугодишна пауза, на иницијатива на градоначалникот на Гевгелија, Андон Сарамандов, а поддржан од Советот на Општина Гевгелија, во Гевгелија од оваа година се возобновува Интернационалниот детски фестивал „Калинка“. Тоа беше и си остана препознатлив гевгелиски музички бренд, кој Општината ќе го финансира со 500.000 денари! Фестивалот ќе се одржи во две вечери, на 19 и 20 мај, а предвидена е и голема денска забава на плоштадот во Гевгелија , на 21 мај со почеток од 12 часот. Организаторот е во преговори со Македонската радио- телевизија за снимање на двете фестивалски вечери на „Калинка 2023“, кои ќе бидат емитувани одложено.

По повод фестивалот, во Гевгелија се одржа прес-конференција, на која за организацијата и активностите околу одвивањето на фестивалот говореа градоначалникот Андон Сарамандов, уметничкиот директор Александар Стојанов и директорката на Дом на култура „Македонија“, м-р Мирјана Крстева-Массети. Градоначалникот Сарамандов истакна дека со огромна чест и задоволство ги поддржува сите активности околу возобновувањето на овој детски фестивал, бидејќи тоа не само што го бараа граѓаните на Гевгелија, туку и поради фактот што Гевгелија и фестивалот „Калинка“ имаат богата традиција. Првиот фестивал, рече Сарамандов, се одржа во далечната 1992 година. Во текот на изминатите години испишана е богата музичка историја со над 500 исполнети детски песни кои станаа познати не само на домашната, туку и кај меѓународната публика.

На „Калинка 2023“ ќе бидат изведени 20 нови детски песни, компонирани од гевгелиски автори, но и автори кои дале белег на фестивалот во минатото како што се: Томислав Таневски, Кристијан Габровски, Нада Ристова, Ристо Самарџиев, а на фестивалот ќе ги видиме и драгите музички гости од Турција, Србија, Словенија, Бугарија и Грција. На сцената на фестивалот ќе биде доделена Специјална награда за еден од основачите на фестивалот, кој, за жал, не е повеќе меѓу живите, на Ѓорги Цуклевски. Наградата за Трајни вредности ќе биде доделена постхумно, а впрочем и целиот фестивал ќе биде посветен токму нему. Љ.Алексовски