По 25 години, „Титаник“ се враќа во киносалите

Филмот „Титаник“, еден од најголемите филмски хитови во историјата на кинематографијата, се враќа на големото платно во освежена верзија на 9 февруари по повод 25-годишнината од неговата премиера. Најпознатиот филм на режисерот и сценарист Џејмс Камерон ќе ја прослави својата годишнина во кината во IMAX® 3D и 3D 4K-формат. Како што потсетува најавата, „Титаник“ освои рекордни 11 „Оскари“, меѓу другите, за најдобар филм, режија, камера и за монтажа. По првото прикажување во 1997 година, тој стана најуспешниот филм на сите времиња, а сега е трет филм со најголема заработка во светот. Приказната за потонувањето на луксузниот прекуокеански брод промовиран како брод што не може да потоне го обиколи светот во рекордно време, а многу филмски критичари се согласуваат дека „Титаник“ и понатаму е најголемиот филм што некогаш е снимен“, се наведува во најавата. Актерската екипа на оваа епска романса, која го одбележа воспитувањето на многу генерации, ја предводат оскаровците Леонардо ди Каприо и Кејт Винслет, а со нив се и: Били Зејн, Кети Бејтс, Френсис Фишер, Бернард Хил, Џонатан Хајд, Дени Нучи, Глорија Стјуарт, Дејвид Ворнер, Виктор Гарбер, Бил Пакстон.