Педесет учесници ќе се натпреваруваат во меѓународната едриличарска регата викендов во Охрид

Меѓународна едриличарска регата во организација на здружението за спортско едрење „Акватика Јахтинг“ ќе се одржи викендов во Охрид, под покровителство на Едриличарската федерација на Македонија и на Општина Охрид.

Регатата ќе се одржи во класите Оптимист, Ласер 4 и 470. Учество ќе земат српските клубови Палич, Панонија 1975 и Смедерево, како и бугарски ЦСЈЦ Централ Софија Јахт Клуб, а струшки Снегар и домаќинот Акватика Јахтинг од Охрид ќе ја претставуваат Македонија, информираат организаторите.

– Станува збор за меѓународна регата што се одржува втора година и со која се продолжува сезоната. Натпреварувањето е во олимписки класи и ќе има 50 учесници, од кои 30 ќе бидат ќе бидат до 14-годишна возраст. Регатата ќе плови помеѓу Охрид и Горица, при што ќе може да се гледа и од брегот, па очекуваме интерес и од публиката. Натпреварувањето е специфично и се трудиме да го доближиме до јавноста – вели Петар Паунче Скитник од Акватика Јахтинг. М.Ж.