Отворена годишната изложба на Факултетот за арт и дизајн при Европски универзитет Скопје – „Имагинар

Отворена годишната изложба на Факултетот за арт и дизајн при Европски универзитет Скопје – „Имагинариум“ „И годинава, студентите од првиот и вториот циклус прикажуваат нови трудови и свежи креативни достигнувања од редовните наставни активности, но и од учествата на конкурси за дизајн, проектите, изложбите, модните ревии. Тие се претставуваа во јавноста, истражуваа за културното наследство, испраќаа важни пораки за одржливост, екологија, инклузија, толеранција, човекови права, слобода и свест за јавните добра“, истакна на отворањето на изложбата проф. д-р Гордана Вренцоска, декан на Факултетот за арт и дизајн при Европски универзитет – Скопје

„Имагинариум“ е насловот на традиционалната годишна изложба на студентите од Факултетот за арт и дизајн при Европски универзитет – Скопје, која во присуство на управниот одбор, ректорот, генералниот секретар, професорите, студентите и многу гости, вчеравечер беше отворена во големата хала на поранешната печатница, во просториите на оваа високообразовна институција. На атрактивната изложба, која предизвика голем интерес во јавноста и особено кај љубителите на современата уметност и дизајн, беа претставени делата на студентите од сите три насоки моден, графички дизајн и дизајн на ентериер, создадени во текот на академската 2021/2022 година.

„Минатата година го прославивме нашиот 15-годишен јубилеј. По две изданија на Годишната изложба, кои се реализираа во дигитална форма поради глобалната пандемија, овој пат се враќаме и во физичкиот простор, кој повторно ни даде можност за интеракција, за размена на идеи и енергии, за дружење. Ќе видиме дела на студентите од графички, моден и дизајн на ентериер, обединети под наслов „Имагинариум“. Оваа изложба е портал кон умствениот простор во кој царува бесконечната имагинација на нашите студенти. И оваа година, студентите од првиот и вториот циклус прикажуваат нови трудови и свежи креативни достигнувања од редовните наставни активности, но и од учествата на конкурси за дизајн, проектите, изложбите, модните ревии. Тие се претставуваа во јавноста, истражуваа за културното наследство, испраќаа важни пораки за одржливост, екологија, инклузија, толеранција, човекови права, слобода и свест за јавните добра“, истакна на отворањето на изложбата проф. д-р Гордана Вренцоска, декан на Факултетот за арт и дизајн при Европскиот универзитет – Скопје.

Најголем дел од изложените дела беа создадени од студентите од прва година на Факултетот за арт и дизајн, но и имаше и дела од нивните постари колеги.

„Сакам да се заблагодарам на сите асистенти и професори кои не само што ни овозможија да го изложиме нашиот труд на оваа изложба, туку и да нè научат за важноста на уметничките квалитети како што се: цртачка основа, ласерска прецизност и креативна слобода. Јас сум многу пријатно изненаден и исполнет со среќа што Факултетот е постојано домаќин на убави настани и програми кои им помагаат на студентите со самопромоција и многу други бенефиции. Оваа изложба е бесценета бидејќи сите вклучени во креативниот процес се сведоци за трудот на студентите низ целата година“, истакна Петар Новковски, член на студентското собрание на Факултетот за арт и дизајн и студент на првата година на насоката графички дизајн. Тој на изложбата се претстави со различни дизајни на плакати кои се применуваат во индустријата како рекламен дизајн.

Стефанија Фидановска, која е студент на четвртата година на моден дизајн, пак, посочи: „Оваа годишна изложба за нас претставува посебно задоволство бидејќи ги изложуваме нашите дела што ги изработуваме во текот целата година и со тоа ја покажуваме нашата имагинација, креативност и пред сè посветеност, од нашата, но и од страна на професорите и асистентите. Изложбите се да ѝ покажеме на јавноста што изработуваме и на тој начин да се промовираме. Јас се претставувам со моделите што ги изработив по предметот „Моден дизајн 2“ и кој е последен од нашата студиска програма од мојата насока. Всушност, од секој предмет имаме изложено дело“, вели Фидановска.

Делата се изработени под менторство на проф. д-р Гордана Вренцоска, проф. м-р Благојче Наумоски, проф. д-р Јана Манева-Чупоска, проф. м-р Зоран Ѓурески, проф. м-р Маја Ѓуреска, доц. м-р Никола Узуновски, проф. д-р Иванка Апостолова, доц. м-р Страхил Петровски, доц. м-р Елена Филиповска, доц. м-р Душица Симовска, како и со помош на соработниците асс. м-р Даниела Димитровска, ум. соработник Елена Макаровска и демонстраторите Ветон Арифи, Ана Миланова и Владимир Јовевски и техничко лице Гордана Божиновска.

Деканката, проф. д-р Вренцоска, се осврна и на достигнувањата на Факултетот за арт и дизајн во текот на изминатата академска година.

„Имавме навистина динамична и исполнета година. Реализирани се предвидените наставни активности, дополнети со работилници, проекти, посети на музеи и галерии, како и дружење со афирмирани гости, професионалци како Ласко Џуровски, Михајло Димитриевски и Билјана Црвенковска. Учествувавме во меѓународниот конкурс за дизајн на плакат „Толеранција“ во Кипар каде што финалист беше Росана Крстева, се претставивме со модни креации во Мала станица преку проектот за културното наследство во модата, учествуваме во хуманитарниот настан „Среќа е да сме сите заедно“, потоа на Младинскиот пролетен салон во Мала станица каде што награда доби нашата студентка Катерина Барабановска, на Денот на театарот со фотографии на Меланија Георгиева, нашата студентка Вероника Љоровска ја имаше својата прва самостојна изложба во галерија КО-РА, а во јуни ќе учествуваме на првиот “Fashion graduation show“, посочи проф. д-р Вренцоска.

На отворањето на изложбата беше доделена и благодарница на Виолета Калиќ од галеријата КО-РА, при Домот на култура „Кочо Рацин“, која несебично во неколку пригоди ги отвори вратите за делата на студентите од Факултетот за арт и дизајн при Европски универзитет-Скопје.

За забавниот музички дел се погрижи диџејката и поранешна студентка на Факултетот, Мелани Димитровска-Дигит. (Д.Т.)