Отворен конкурс за учество на „Лузер фест“

„Лузер фест“, вечерта посветена на новата музика од македонската сцена, се враќа повторно во оф-програмата на фестивалот „Таксират“, како предвесник на главната вечер на фестивалот. Речиси 20 години, оваа фестивалска вечер се одржува ставајќи го фокусот на младите музички изведувачи, давајќи им можност и поттик да ги покажат своите таленти и да продолжат професионално да ја градат својата музичка кариера.

Деновиве е отворен конкурс за демо-изведувачи т.е. групи или самостојни изведувачи со авторска музика, кои досега ја немаат издадено во студиски албум или на каков било официјален носач на звук. Сите други информации за правилата на учество се наоѓаат на онлајн формата за пријавување објавена на официјалната веб-страница нa фестивалот „Таксират“, која е потребно целосно да се пополни најдоцна до 25 октомври.

Потоа, од сите пријавени артисти, ќе бидат селектирани финалистите што ќе настапат во живо на „Лузер фест“. На концертната вечер ќе биде избран и победникот, заеднички според гласовите на публиката и на жирито, кое, пак, се објавува непосредно пред одржувањето на настанот. За најдобриот следува награда – снимање и издавање студиски албум. Албумот ќе биде снимен во професионално музичко студио, а објавен под етикетата на „Пасворд продакшн“.

„Лузер фест“ годинава ќе се одржи на 27 ноември во Младинскиот културен центар.