Отворен 19. „Зимски салон“ на ДЛУМ/ ФОТО ГАЛЕРИЈА

Дела на повеќе од 40 македонски ликовни уметници кои работеа на тема „Повторно поврзување, обновување, воздигнување, реконструирање“ се изложени на 19-от „Зимски салон“ на ДЛУМ, што од денеска до 19 февруари, се одржува во Чифте амам, во Национална галерија.

Селекторка на годинашниот салон е професорката на Националниот универзитет за уметности во Букурешт, Анка Боериу, а темата е „Повторно поврзување, обновување, воздигнување, реконструирање“

На изложбата се претставени дела на 42 македонски автор, а од страна на кураторот и селектор на изложбата се поканети и пет автори-гости од Романија: Марија Петку Чиоибас, Мирела Траистару, Патриција Теодореску, Ралукалариа Деметреску и Река Цсапо Дуп.

Инаку, „Зимскиот Салон“ на ДЛУМ е врвна ликовна манифестација основана во 1991 година како ликовна посебност со свои правила и критериуми. Денешната физиономија на „Зимскиот Салон“ ги има задржано основните карактеристики: професионалност, строга селекција на учесници, квалитетен каталог и соодветна медиумска покриеност.

Почнувајќи од 2003 година, наградата „Гранд-При“ (престој во атељето на„Citè des Arts“ во Париз) ја овозможува Министерството за култура на Република Македонија, а од 2006 година ДЛУМ вградува уште еден критериум, а тоа е конкретна тема на „Зимски Салон“, со што ги ангажира уметниците на индивидуален творечки чин. Од 2009 година оваа манифестација прераснува во меѓународна.