Остварувања од богатата филмографија на Анджеј Вајда во Кинотека

Во Кинотеката, од 16 до 22 декември, љубителите на филмови ќе имаат можност да погледнат избор од шест остварувања од богатата филмографија на Анджеј Вајда (1926-2016). Шесте наслови, во рамки на филмската недела посветена на Вајда, хронолошки ги опфаќаат раните (црно-бели) трудови на полскиот режисер „Канал“ (Kanal, 1957), „Пепел и дијаманти“ (The Ashes and Diamonds, 1958), „Невини волшебници“ (Innocent Sorceres, 1960), „Пепелта“ (The Ashes, 1965) -епска сага за полските легии во Наполеоновите војски од почетокот на 19 век, како и двата иконични наслови од зрелата доба на авторот: „Човек од мермер“ (Man of Marble, 1977) и „Човек од железо“ (Man of Iron, 1981).

Неговиот авторски потпис стои на шпиците на повеќе од 50 филмски и телевизиски проекти во Полска и интернационална продукција, има освоено 60 награди на најпрестижните филмски фестивали во светот и речиси уште толку номинации. Меѓу останатите награди, во 1990 година ја добива „Европската филмска награда за животно дело“, на „Берлинале“ во 1996 ја добива наградата „Сребрена мечка“ за посебен придонес во филмската уметност, на Филмскиот фестивал во Венеција во 1998 добива „Златен лав“ за животно дело, во 2000 и почесен „Оскар“, а во 2006 година и почесната награда „Златна мечка“ на Берлинале.

Роден е на 6 март 1926 година во Сувалки, Полска, починал на 9 октомври 2016 година во Варшава. Од 1950 до 1954 студира филмска режија на Филмската академија во Лоѓ, а веднаш потоа го снима и споменатиот дебитантски филм „Поколение“, воена драма која со „Канал“ и „Пепел и дијаманти“ ја сочинуваат неговата трилогија за Полска за време на Втората светска војна. Со „Канал“ започнува и долгата низа награди од најзначајните филмски фестивали во Европа и светот: „Специјална награда на жирито“ во Кан за „Канал“, ФИПРЕСЦИ во Венеција за „Пепел и дијаманти“.

Сцена од „Човек од мермер“

„Вајда, низ неколкуте фази во неговото филмско творештво, ја дели судбината на неговите колеги и коавтори – од политичките пресии до признанијата на престижни филмски фестивали во светот. Во 70-тите години на минатиот век, историјата на филмот ја сведочи зрелата фаза во творештвото на Вајда, кога се нижат филмовите ‘Без анестезија’ (Bez znieczulenia, 1978) со „Награда на екуменското жири“ во Кан; „Човек од мермер“ (награда ФИПРЕСЦИ во Кан); „Човек од железо“ ја доби „Златната палма“ и „Наградата на екуменското жири“ на Канскиот фестивал во 1981 и номинација за „Оскар“, но тогашните комунистички власти во Полска го повлекле филмот. Во осумдесеттите години Вајда повторно снима европски копродукции. Со „Дантон“ (Danton,1983), со Жерар Депардје во главната улога, ја освојува националната филмска награда на Франција „Цезар“ за режија; во Германија го снима „Љубов во Германија (Eine Liebe in Deutschland, 1983), во Полска го реализира „Хроника на љубовните настани“ (Kronika wypadków milosnych, 1986), а во Франција го снима „Бесови“ (1988)“, посочуваат од Кинотека.

И покрај годините, Вајда и на преминот на двата века снима филмови, речиси до самиот крај на животот. Неговата филмографија е збогатена со биографската драма „Корчак“ (Korczak, 1990), па следуваат „Настасја Филиповна“, според „Идиот“ на Достоевски (1994), воената драма „Господин Тадеуш“ (Pan Tadeusz, 1999), и „Одмазда“ (Zemsta, 2002), според неговата театарска претстава, во која соработува со Роман Полански. Во 2007 го реализира „Катин“ (Katyn), историската драма за масакрот на полските офицери во Катинската шума во 1940, кога настрадал и татко му, и филм кој бил прогласен за филм на годината во Полска, а добил и номинација за „Оскар за најдобар странски филм“. Меѓу последните реализирани филмски наслови му се „Слатко знаме“ (Tatarak, 2009); потоа, биографската драма „Валенса: Човек на надежта“ (Walensa. Czlowiek z nadziei, 2013) за водачот на полското движење Солидарност, и повторно биографската драма „Последователни слики“ (Afterimage, 2016) за полскиот сликар Владислав Стржемински.

„Вајда секогаш го истакнувал компактниот тим со кој работел филмови во одредени периоди – од кинематографери, монтажери, сценографи и костимографи, меѓу другите – а секако и актери со кои имал честа соработка. Најмалку тројца актери ги одбележаа неговите филмови, или, обратно, може слободно да се каже дека Вајда низ неговите филмови создаде неколку извонредни актери: Збигњев Цибулски, Даниел Олбрицки, Јежи Радзивилович, итн. Во тој авторски ‘хабитус’ на Вајда има и една исклучителна актерка, Кристина Јанда. Паралелно со филмот, Вајда поставува и успешни претстави во полските театри, често користејќи го методот да ја ‘провери’ темата на театарските штици, а потоа пред филмските камери“, додаваат од Кинотеката.