Оркестарот за џез музика добива нова адреса и простор за трајно користење

Оркестарот на Здружението на џез-музичари и слободни уметници ќе добие нова адреса и простор за трајно користење. Просторот е со површина од 475 квадратни метри, а проценетата вредност на реновирањето е околу 200 илјади евра или над 11 милиони денари. Овие средства ги обезбедија Министерството за култура и вицепремиерот за економски прашања, Фатмир Битиќи.На денешната прес-конференција на министерката за култура, Бисера Костадиновска-Стојчевска и Битиќи, тие појаснија дека обезбедена е изработка на Основен проект за реновирање и уредување на просторот и за санација на инсталациите на подрумските простории во зградата на Националната установа Национална опера и балет.„Просторот е со површина од 475 квадратни метри и со проектот се предвидува уредување на простор за проби и за режија, мало студио, простор за чување инструменти и ноти, машки и женски гримиорни, тоалети и три канцелариски простории“ – изјави Костадиновска-Стојчевска.Со работата на Здружението, министерката вели дека се оживуваат многу стари спомени за Скопје и го заокружуваат музичкиот простор каде што се и Средното музичко училиште, Факултетот за музичка уметност, Националната опера и балет, Филхармонијата, па и живиот парк „Ибни Пајко“.Министерката заклучи дека со Оркестарот за џез-музика се комплетира и се збогатува ова музичко и уметничко опкружување, и со оглед на тоа што џезот е музика на слободни стилови, таа е убедена дека постојаното присуство на џезерите овде ќе значи нов квалитет за културата, за социјалниот живот и за сликата на Скопје.