Омаж за маестро Џамбазов – ќе пеат Тамара, Пере, Тарабунов, Антониа…

Особен предизвик за сите е настапот на Антониа Гиговска, која се одлучи за песната „Охрид и јас“ што на еден од поодамнешните скопски фестивали брилијантно, на македонски јазик, ја испеа легендарната Тереза Кесовија. За Антониа, тоа е голем предизвик, бидејќи не секој пејач се нафаќа да пее песна што е испеана пред тоа од големата пејачка дива Тереза. Антониа се осмели!

Иако само физички замина, тој остави огромен музички опус зад себе. Станува збор за легендарниот македонски композитор и музичар Александар Џамбазов, кого сите го знаеме и како татко на шоуменот Игор Џамбазов.

Во негова чест, утревечер (четврток), во Скопје, во големата сала на Македонската филхармонија, ќе се одржи концерт. Концертот е наречен „Омаж на маестро Александар Џамбазов” и ќе биде со хуманитарен карактер. Воедно е во рамките на програмата на 45. „Денови на македонската музика“.

Сите средства од продажбата на билетите ќе одат на сметката на БАЛАНС МК – Асоцијација за детски дијабетес на Македонија. Диригент ќе биде познатиот Џијан Емин, додека на пијано ќе бидат Елена Атанасовска-Ивановска и Иво Настевски.

Присутната публика ќе може да ужива, се надеваме, во вонсериските интерпретации на популарните поп-пејачи Тамара Тодевска, Александар Тарабунов, Никола Перевски-Пере и Антониа Гиговска.

Тие ќе ги пеат познатите забавни хитови што се авторско дело на Џамбазов. Па така, Антониа Гиговска ќе ни ја долови волшебноста на балканскиот Ерусалим преку песната „Охрид и јас“, која на еден од поодамнешните скопски фестивали брилијантно, на македонски јазик, ја испеа легендарната Тереза Кесовија. За Антониа, тоа е голем предизвик, бидејќи не секој пејач се нафаќа да пее песна што е испеана пред тоа од големата пејачка дива Тереза.

Ќе ја слушнеме и Тамара Тодевска со, исто така, познатата песна „До видување“, нејзиниот колега Александар Тарабунов ќе пее „Љубов неверна“, а Никола Перевски-Пере ќе ни ја донесе песната „Само ти“. Останува да се опуштите и да уживате во нотите на есенската магија од овој концерт. (Д.М.)