„Одликувајте го херојот Јован“: Граѓани бараат државен орден за момчето кое спаси 21 живот во Кочани

20.03.2025 Mart Cetvrtok

19-годишниот Јован Костадинов од Виница, кој стана познат како „тивкиот херој“ во големата трагедија што ја погоди Македонија, спасил 21 живот од дискотеката во пламен во Кочани, постојано враќајќи се за да ги извлекува девојките и момчињата.На социјалните мрежи во земјава, но и во странство, каде се прошири приказната за подвигот на Јован, сè побројни и сè погласни се повиците државата да му укаже почит на младиот херој и да го одликува за покажаната храброст.

„Тој беше надвор за време на пожарот, успеа да најде вода во близина, ја натопи маицата што ја стави преку лицето и без двоумење влезе внатре низ страничната соба за да ги спаси луѓето“, се вели во една од објавите на социјалните мрежи.

Една од мајките на детето повредено во пожарот јавно му се заблагодари на Јован.„Во најтемните моменти на паника и хаос, кога сите беа збунети и исплашени, Јован се појави како светилник на надежта. Без размислување го зеде син ми, кој беше под урнатините на дискотеката, и го носеше на грб низ оган и чад, сè до болницата во Кочани, за да го спаси, додека сите околу него трчаа и се бореа за живот“, напиша таа.

Храбриот тинејџер по пожарот е примен на Клиниката на токсикологија поради вдишување чад и, според информациите, е во стабилна состојба.

Министерот за здравство Арбен Таравари денеска најави дека државата постхумно ќе му оддаде почит на возачот на брзата помош Иле Гочевски, кој почина откако 32 часа ги превезуваше повредените во пожарот и 11 пати го извозе патот од Кочани до Скопје и назад.

„Тој ден имаше вонредна состојба, сите работевме повеќе од 20 часа. Немам информации колку часа работел возачот, но дека направил огромна работа во транспортот на пациентите, е непобитно. Како министер за здравство планирам да му се јавам на неговото семејство. Планирам постхумно да му оддадам почест следната недела“, рече Таравари.