Од железото на „Макстил“ студентите на ФЛУ направија скулптури

19.06.2021 Juni Sabota

Старото железо не секогаш мора да заврши во отпад, загадувајќи ја животната средина, туку може да се искористи и за креативни цели, како материјал за изработка на уметнички дела. Оваа идеја доведе до соработка меѓу компанијата „Макстил“ и Факултетот за ликовни уметности, на задоволство на студентите од насоката вајарство, кои го искористија железото за изработка на своите дела, претставени на Годишната завршна изложба на студентите од ФЛУ.

Изложбата е отворена на две локации во рамките на факултетот, во ателјеата на Катедрата по сликарство, вајарство и ликовна педагогија на Педагошката академија и во „Сули-ан“ во Старата чаршија. Годишната изложба на ФЛУ е сумирање на резултатите и процесите на студентите, постигнати низ целата година на студиите. Компанијата „Макстил“ кон крајот на минатата година донираше материјали и апарати за обработка и за изработка на скулптури и за изучување на скулпторските техники.

Железото доби нов живот во делата на студентите – Фото: Маја Јаневска-ИлиеваДиректорот на „Макстил“, Иван Бановски, ја посети изложбата на ФЛУ – Фото: Маја Јаневска-Илиева

Иван Бановски, генерален директор на „Макстил“, вчера ја посети изложбата на студентите, ги разгледа делата и зборуваше за материјалите од кои се направени. – „Макстил“ како компанија, која доаѓа од челичната индустрија, со донацијата на материјалите, но и со реализацијата на оваа изложба, овозможи на старото железо да му се даде нов живот и тоа да добие уметничка вредност. Со ФЛУ имаме долгогодишна соработка, но импресиониран сум гледајќи ги овие скулптури изработени од вештите раце на студентите, нашите идни скулптори. Убеден сум дека со градење на нивните кариери, овие скулптури ќе имаат сѐ поголема вредност. Се надевам дека помогнавме во создавање автентичен уметнички израз кај секој од студентите, а со тоа и за нивна натамошна професионална промоција и афирмација. „Макстил“ останува посветена општествено-одговорна компанија, која го поддржува образовното и интелектуалното надградување на младите – рече Бановски.

Деканот на ФЛУ, Беди Ибрахим, професорот Жарко Башески, раководител на Одделот по вајарство, и студентите му се заблагодарија на директорот на „Макстил“ и посочија дека и во иднина ќе продолжат да работат во овој дух, со цел со своите дела да придонесат во развојот на современата македонска уметност. – Кон крајот на минатата година добивме донација од „Макстил“ во материјали, алати и машини за изработка на уметнички скулптури. Студентите веднаш добија идеи како да ги преточат овие материјали во скулптури. И навистина направија квалитетни уметнички дела. Оваа изложба е доказ за тоа. Особено во едно вакво тешко време на пандемија, ваквите активности многу значат за студентите и за факултетот. Донацијата треба да биде пример и за другите приватни компании, како што можат да помогнат во образовниот систем, во реализација на студиските програми, особено во уметноста – рече деканот на ФЛУ, Беди Ибрахим.

Познатиот скулптор и професор, Жарко Башевски, под чие менторство работат студентите по вајарство, вели дека едукативниот процес во овој уметнички израз подразбира употреба на железен материјал, но и специфични апарати за нивна обработка. – Донацијата и оваа изложба го зголемија ентузијазмот кај студентите, ги зголемија нивниот елан за создавање нови уметнички дела. На факултетот имаме доволно простор за индивидуална работа на секој студент. Имаме и галерија и можност за промоција на нивните дела. Се надеваме дека овие скулптури ќе бидат поставени на јавен простор каде што ќе може да ги види повеќебројна публика – посочи Башевски.

Студентите кажаа дека со донираните материјали добиле поттик да работат и да ги оживеат нивните идеи во нови скулптури. – Изминатата година имаше застој, не се организираа изложби и настани каде што ќе можеме да ги покажеме нашите дела. Но со оваа изложба тоа се промени. Се надеваме дека и во иднина ќе има вакви пригоди, а овие скулптури ќе заживеат на некој јавен простор – рече Тоше Пешовски, апсолвент на катедрата по вајарство на ФЛУ. „Макстил“ и Факултетот за ликовни уметности имаат воспоставено континуирана соработка, која постојано се продлабочува со разни активности, како дел од исклучително важната корпоративна вредност на компанијата и нејзиниот значаен општествен придонес.

Влезот на изложбата е бесплатен, велат организаторите, а истовремено додаваат дека при посета на ателјеата, потребно е да се почитуваат безбедносните мерки за заштита од коронавирусот.