Облак: Не заслуживме да загубиме, мора да му признаеме една работа на Реал

Атлетико Мадрид не го одбрани својот терен и претрпе пораз од Реал Мадрид од 2-1 во дербито во шпанскиот шампионат.

„Кралевите“ максимално ги користеа своите шанси, додека пак домаќините имаа проблеми во завршницата на акциите и најдобар доказ за тоа е и голот што го постигнаа кој беше доста случаен и беше дело на дефанзивецот Ермосо.

Голманот Јан Облак не е задоволен од резултатот, односно смета дека шампионот не заслужил да ја освои „Ванда Метрополитано“.

-Овој пораз има горчлив вкус, го загубивме дербито, многу важен натпревар. Не бевме толку лоши. Не заслуживме пораз, но таков е фудбалот. Тие го искористија тоа што го имаа, а ние не. Вкусот на поразот е секогаш лош и сите сме тажни, -рече Облак кој потенцираше една работа на Реал, играта во дефанзива.

-Во последно време Реал Мадрид се брани одлично. Тие беа добри во одбраната во последните сезони и имаат брзи играчи кои можат да играат на контра. Нивните играчи од средниот ред прават добри додавања. Клучната работа е што тие не оставаат простор и имаа среќа да постигнат два гола, тоа им ја олесни работата, -заклучи Словенецот.