Обамејанг го зема „проколнатиот“ број во Челси, Карагер даде оценка за реализираниот трансфер

Пјер-Емерик Обамејанг одново ќе го гледаме во англискиот фудбал и тоа во редовите на премиерлигашот Челси.

Габонецот по само неколку месеци минати во Барселона доби шанса да се врати во Англија, Лондон, шанса која одлучи да ја искористи и да потпише за „сините“, големиот градски ривал на клубот за кој настапуваше неколку години-тоа е Арсенал.

Напаѓачот веќе го одбра дресот кој ќе го носи и ја зема „деветката“ која важи за „проколнатиот“ број на „Стемфорд Бриџ“. Многу напаѓачи се мачеа носејќи ја таа бројка во Челси, последниот беше Ромелу Лукаку, претходно проблеми имаа Гонзало Игуаин, Алваро Мората, Радамел Фалкао, Фернандо Торес…

Останува да видиме дали Обамејанг ќе заблеска како што знае и ќе ја прекине таа поша низа со „деветки“ на поранешниот англиски шампион.

Овој трансфер секако донесе доста реакции и коментари на островот, а една од нив беше на Џејми Карагер кој сега работи како стручен аналитичар, па во однос на зделката порача:

-Тој е квалитетен играч, нема сомнеж околу тоа. Мислам дека е добро засилување. Луѓето може да ја преиспитаат улогата на Арсенал во ова и фактот дека го пуштија бесплатно, а сега Челси плаќа пари за него 12 месеци подоцна. Мислам дека тоа е добро засилување за Томас Тухел и Челси, а исто така правилна одлука на Микел Артета – погледнете каде е Арсенал во моментов.

-Знаеме дека Обамејанг носи голови и квалитет, но понекогаш има ситуации и прекршоци надвор од теренот или во соблекувалната и Артета не можеше тоа да го поднесе. Ама Тухел добро го познава од времето во Борусија Дортмунд и како неутрален среќен сум што се врати во Премиер лигата бидејќи е брилијантен играч, -порача Џејми.