Нуркач пронашол монети од 4 век во Италија

Повеќе од 30.000 бронзени монети што датираат од 4 век биле пронајдени од нуркач што нуркал на брегот на Сардинија, Италија. Ова откритие укажува на можноста дека станува збор за бродолом, според италијанското министерство за култура.

Нуркачот забележал метални парчиња во плитка вода недалеку од градот Арзахена, а се покажало дека станува збор за римски бронзени или бакарни монети, кои подоцна ги користеле Византијците. Судејќи според тежината, вкупниот број на монетите треба да биде помеѓу 30.000 и 50.000, што е повисоко од 22.888-те пронајдени во близината на Ситон во Велика Британија во 2013 година. Монетите се во ретка состојба на зачуваност, бидејќи само четири се оштетени. Тие датираат од периодот помеѓу 324 и 340 година и биле произведени низ Римската Империја.

– Ова откритие укажува на богатството и важноста на археолошкото наследство што нашето морско дно сè уште го чува од најраните времиња – рече Луиџи Ла Рока.

Министерството за култура соопшти дека на оваа локација, на песочната чистина меѓу плажата и морската трева, би можело да се најдат и остатоците од бродот. Покрај монети, пронајдени се и делови од високи грчки или римски бокали со тесно грло и две рачки.

– Богатството пронајдено во водите на Арзахена претставува едно од најважните откритија на нумизматички наоди во последните неколку години – рече Ла Рока.

Тој додаде дека регионот има извонредно наследство, но дека е многу кревок и загрозен од природни феномени и човечка активност.