„Ноќите кога заспивавме во Помпеја“ на Стојановски – македонски кандидат за наградата „Балканика“

„Ноќите кога заспивавме во Помпеја“ е наслов на романот на Давор Стојановски којшто е избран за македонски претставник во трката за меѓународната книжевна награда „Балканика“. Комисијата која ја донесе одлуката е во состав: проф. д-р Јордан Плевнеш, претседател, проф. д-р Александар Прокопиев и Јовица Тасевски Етернијан.

Изборот е направен во конкуренција на 13 пристигнати книги од кои во најтесен избор влегле и делата „Најосаменото место“ од Симеон Јанков и „Естом“ од Николина Андова Шопова. Комисијата одлучи за наградата „Балканика“ да се натпреварува „Ноќите кога заспивавме во Помпеја“ од писателот Давор Стојановски, роман во издание на „Или-Или“.

„Романот ‘Ноќите кога заспивавме во Помпеја’ од Давор Стојановски влегува суверено во македонската романескна стварност со поетичка енергија што го разорува класичното време на нарацијата. Неговата современост е негова безвременост и затоа читателот ја чувствува таа силна дислокација што овој роман му ја приредува да не знае каде се наоѓа додека го чита: на Балканот, во Европа или во никогаш невидените предели на сите меридијани, каде секој од нас може да се најде со фаталната слика на скаменетите ликови од Вулканот во Помпеја, сфаќајќи дека и целата планета се претвора во опасна зона на политичкиот, нуклеарниот, социјалниот и еколошки терор и дека античката етимологија на зборот ‘Planetos’ или ‘Осамен човек’, може во секој миг низ природните стихии да нè пренесе во ‘Беззаконието на Вечноста’, во која не се знае зошто сме дојдени на овој свет и каде заминуваме!”, стои во образложението на комисијата.

Манифестацијата „Балканика“ e планирано да се одржи во првата половина од 2023 година. Како што известуваат од „Магор“, досегашни добитници на оваа престижна награда од Македонија се Венко Андоновски со „Папокот на светот“ и Александар Прокопиев со „Човечулец“.