Новиот „Спајдермен“ испиша историја — заработи 927 милиони долари за само еден викенд фото и видео
- Aleksandar Santovski
- Aug 4
- 1 min read
04.08.2026 Avgust Vtornik
„Спајдермен: нов ден“ (Spider-Man: Brand New Day) ги надмина и најсмелите очекувања на филмската индустрија, откако за време на првиот викенд од прикажувањето заработи неверојатни 927 милиони долари на светските кино-благајни, пишува „Варајети“.
Од нив, 355 милиони долари се остварени во Северна Америка, што претставува второ најголемо отворање во историјата на американскиот бокс офис. Пред него останува само „Одмаздници: крај на играта“ (Avengers: Endgame), кој во 2019 година дебитираше со 357 милиони долари.
На меѓународните пазари, новото продолжение за суперхеројот на „Марвел“ инкасираше дополнителни 573 милиони долари, потврдувајќи дека Питер Паркер и понатаму е еден од најпопуларните филмски ликови во светот.
Филмот, чија продукција чинеше околу 225 милиони долари, е во режија на Дестин Даниел Кретон, а главната улога повторно ја толкува Том Холанд. Критиката и публиката го пречекаа исклучително позитивно – има 90 проценти позитивни оценки на „Ротен томејтос“ и оценка „А“ според анкетите на „СинемаСкор“.„Ова е навистина феноменално отворање и им благодариме на гледачите ширум светот што го доживеаја филмот онака како што беше замислен да се гледа“, изјави претседателот на „Марвел студиос“, Кевин Фајги.
Во исто време, „Одисеја“ (The Odyssey) на Кристофер Нолан остана силен конкурент, заработувајќи уште 51 милион долари во својот трет викенд. Со тоа, двата филма придонесоа за најуспешниот викенд во историјата на кино-благајните, со вкупна заработка од околу 430 милиони долари само во Северна Америка.
Според аналитичарите, успехот на „Спајдермен: нов ден“ покажува дека, и покрај разговорите за замор од суперхеројските филмови, публиката и понатаму е подготвена масовно да ги посетува кината кога ќе добие квалитетна приказна.
По ваквиот почеток, се очекува филмот многу брзо да ја надмине границата од една милијарда долари глобална заработка.
Comments