Нов непријатен удар за Србинот: Ѓоковиќ остана без еден од најважните спонзори

Новак Ѓоковиќ се соочува со сложена ситуација за настап на големите турнири поради неговиот вакцинален статус, но ова попладне пристигна уште една вест која е неповолна за српскиот тенисер кој од вчера е светски рекет број два.

Рекордерот по бројот на минати седмици на врвот на АТП листата доби шок неполни два дена откако остана без тронот на светскиот тенис, бидејќи еден од неговите најголеми и најважни спонзори се повлекува и реши да ја прекине соработката со Ноле.

Францускиот произедувач на автомобили „Пежо“ веќе нема да биде еден од најголемите спонзори на Ѓоковиќ, а тоа го потврди и генералниот директор Карло Таварес.

– Точна е информацијата која е пласирана во светските медиуми, нема да ја продолжиме соработката со Ѓоковиќ, – гласи краткото обраќање на Таварес.

„Пежо“ беше еден од клучните спонзори на довчерашниот светски рекет број еден од 2014-та година, но бидејќи разделбата пристигнува во едно чувствително време, светските медиуми нудат две причини за прекинот на соработката.

Едни тврдат дека главна причина за раскинот е вакциналниот статус на Ноле кој реши да не прими две дози против Ковид 19, а други информираат дека одговорните луѓе на „Пежо“ донеле ваква одлука поради финансиската загуба во автоиндустријата во изминатите две години.