Нејмар седна на обвинителна клупа, Шпанците бараат затворска казна

Голот на Нејмар вчера му донесе победа на ПСЖ во дербито со Олимпик Марсеј, за денес да седне на обвинителна клупа во Барселона. Бразилецот е обвинет за корупција и измама поради неговиот трансфер во Барселона пред речиси десет години, а учеството во случајот може да му донесе двегодишна затворска казна. Шпанските обвинители бараат затворска и парична казна за Нејмар, а обвинети се и неговиот татко и поранешните претседатели на Барселона, Сандро Росел и Жозеп Бартомеу. Случајот е изграден врз докази на компанијата „ДИС“ која имала 40 проценти од правата на Нејмар, а кога тој заминал од Сантош во Барса, им бил пресметан процент од трансфер сума која изнесувала 17 милиони евра. Компанијата и обвинителите имаат докази дека трансферот бил тежок над 80 милиони евра, па затоа од сите инволвирани ќе се бара и сериозна финансиска компензација, додека судот ќе одлучи дали се потребни и затворски казни.