НБА ги одреди казните за инцидентот кој го предизвика Јокиќ

НБА лигата ги одреди казните за инцидентот во кој главни актери беа Никола Јокиќ и Маркиф Морис, а очекувано посериозна е таа доделена на српскиот кошаркар.

Ѕвездата на Денвер доби суспензија на еден натпревар од НБА лигата, додека Морис е казнет со 50.000 долари поради неспортското однесување во дуелот со Јокиќ.

Ова значи дека Јокиќ вечерва нема да игра против Индијана, на дуел на кој Денвер е домаќин, додека Мајами најави пауза и за Морис, но поради повредата на вратот која ја заработил.

Српскиот репрезентативец се изнервира по еден прекршок на Морис и со силен удар од зад грб го испрати членот на Мајами на паркетот по што настана мешаница на теренот.

Во меѓувреме, се вмешаа и браќата на НБА ѕвездите, па по заканата од братот на Морис, стигна одговор и од членовите на семејството Јокиќ.