НАСА бара доброволци за симулација на патување на Марс

12.08.2021 Avgust Cetvrtok

Американската вселенска агенција (НАСА) соопшти дека бара лица што ќе бидат во составот на екипажот што ќе учествува во едногодишни симулации на патување на Марс. Во соопштението на официјалната интернет-страница на НАСА е наведено дека симулацијата што ќе се одржува во вселенскиот центар „Џонсон“ ќе почне есента 2022 година.

Целта на симулациите е откривање на сите предизвици и проблеми за време на идните патувања на Марс и на Месечината.

Грејс Даглас од НАСА вели дека тоа ќе биде многу важен процес.

– Астронаутите на овој начин ќе се запознаат со предизвиците и со проблемите што ги чекаат во вселената. Тоа ќе ни помогне да бидеме целосно подготвени за идните подвизи – изјави Даглас.

На конкурсот може да се пријават лица на возраст од 30 до 55 години, потребно е и познавање на англиски јазик и добра здравствена состојба, а кандидатите мора да бидат и државјани на САД или да поседуваат постојана дозвола за престој во оваа држава.