Наполи објави моќно видео: Марадона го предаде трофејот од рајот

Поновата генерација навивачи на Наполи никогаш немаа почувствувано што значи да се стане национален шампион, но овој актуелен тим на Лучијано Спалети го оствари сонот на целиот град и после 33 години стана првак во Италија. Наполи го освои Скудетото на доминантен начин и демонстрираше страшен фудбал кој привлече симпатии од цела Европа, па на пет кола до крајот, Елиф Елмас и соиграчите сосема заслужено се израдуваа на големиот успех. Неапол беше обоен во сино после 33 години и последната титула која беше освоена од Диего Армандо Марадона, па поради тоа, клубот сега пронајде уникатна симболика во чест на својата неповторлива легенда. Марадона му донесе две шампионски титули на Наполи кои беа единствени до овој момент, а сега градот конечно ја дочека третата и поради тоа беше направена специјална анимација. Наполи денеска објави видео на кое е прикажано како Марадона го предава шампионскиот пехар од рајот и ја испрати следната порака: – Наполи – место каде соништата можат да се остварат….