Награда за „Бизнисот на задоволството“ на Гоце Цветановски од италијанската полиција; Најдобар филм на „Интернешнал Полис Артс Авардс Фестивал“

01.04.2024 April Ponedelnik

„Интернешнал Полис Артс Авардс Фестивал“ е престижна културна манифестација во Италија, каде што полицијата веќе 27 години наградува уметници во областа на филмот, музиката, сликарството, литературата, театарот, телевизијата. Лауреати на овој фестивал биле артисти од рангот на Енио Мориконе, Андреј Кончаловски, Абел Ферара, Никита Михалков, Виторио Стораро, Џина Лолобриџида, Мет Дилон, Колин Фирт

Италијанската полиција, на свечена церемонија во Тоскана, му ја врачи наградата за најдобар филм на „Бизнисот на задоволството“ на Гоце Цветановски, во рамките на „Интернешнал полис артс авардс фестивал“ (International Police Arts Awards Festival – IPAAF).

Како што се наведува во соопштението, станува збор за престижна културна манифестација во Италија, каде што полицијата веќе 27 години наградува уметници во областа на филмот, музиката, сликарството, литературата, театарот, телевизијата. Лауреати на овој фестивал биле артисти од рангот на Енио Мориконе, Андреј Кончаловски, Абел Ферара, Никита Михалков, Виторио Стораро, Џина Лолобриџида, Мет Дилон, Колин Фирт.

Фестивалот традиционално, се одржа во октомври, но поради неможноста на Цветановски тогаш да присуствува, викендов во Монте Сан Савино му беше доделено високото признание за најдобар филм, како и бронзена статуетка – реплика на Кимерата на Арецо.

-Имавме прекрасни два дена во живописното Монте Сан Савино и ви благодарам за гостопримливоста. Во мојот развој како филмски автор учев од италијанските мајстори на уметноста како што се Фелини, Серџо Леоне, Торнаторе… Среќен сум што оваа награда доаѓа токму од полицијата што има благородна задача да ги штити граѓаните. Во филмот се прикажани многу неправди, но ние како луѓе имаме потреба да веруваме дека правдата ќе победи, рече Цветановски пред присутните гости на свеченоста.

Организаторот и основач на фестивалот, Орацио Ананиа, речиси три децении ја афирмира уметноста од целиот свет, доближувајќи ја до полицијата и населението во Тоскана – регион кој, освен по вкусната храна и доброто вино, е светски познат и по својата богата културна историја.

-„Бизнисот на задоволството“ обработува актуелна тема во која драмата се испреплетува меѓу реалноста и надреалноста, и го држи гледачот во неизвесност до самиот крај. Одличната музичка подлога придонесува за хармонијата меѓу сликата и звукот во раскажувањето на приказната, рече Орацио Ананиа, кој му ја врачи нагрaдата на Цветановски и го покани на следното издание на фестивалот.

На настанот беше отворена и изложба на фотографии на познатиот италијански автор Макс Анџелони, промовирана книга-есеј на Доменико Палатеља за творештвото на режисерот Франко Зефирели, a беше изложена и слика на Дариа Федотова од Молдавија. Присуствуваа и реномираниот филмски критичар, Игнацио Сенаторе, како и ѕвездата на италијанската висока мода – дизајнерот  Давидe Мучинели.

Ова е седма награда за „Бизнисот на задоволството“ на филмските фестивали низ светот и прва во Италија.

Политичкиот трилер „Бизнисот на задоволството“ ја следи приказната на новинарка која опседната со исчезнувањето на нејзината најдобра пријателка, подготвува тајна операција со цел да разоткрие мрежа за трговија со жени. Но, како што нејзините соучесници се приближуваат до шефот, ситуацијата излегува од контрола.

Улогите ги толкуваат: Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски. Филмот е снимен со поддршка од Агенцијата за филм.