Нагелсман: Не сум изненаден што Интер заврши пред Барселона

Дербито меѓу Баерн Минхен и Интер нема никакво резултатско значење и ќе се игра исклучиво за престиж, бидејќи двата тима веќе ги знаат своите позиции во табелата и се сигурни патници во осминафиналето.

По пет одиграни кола во групната фаза, Баерн со максимални пет победи е прв и има 15 бода, додека Интер ја доби битката со Барселона и го обезбеди второто место во претходната рунда која се играше минатата седмица.

Иако многумина го прежалија Интер пред почетокот на сезоната и го испратија во Лига Европа, на крајот таму ќе игра Барселона, а од ова сценарио не е многу изненеаден Јулијан Нагелсман.

– Интер има многу добар тим, слично како што станува збор и за Барселона. Во фудбалот, најситните детали ја прават разликата. Во Лигата на шампионите немате право на кикс и не е дозволено да се лизнете.

– Интер има силен тим, добро се покриени на сите позиции и за мене не е изненадување тоа што тие завршија пред Барселона, – вели Нагелсман пред вториот меч со Италијанците.