Мурињо откако загуби од најслабиот тим во Серија А: Научив да не плачам после пораз

Кремонезе е убедливо најслаб тим во Серија А и се уште нема остварено ниту една победа, па затоа чудото кое го прави во Копа Италија има уште поголемо значење. Најслабиот тим во Калчото има биланс од осум освоени бода и е закован за дното на табелата, но сега во две последователни рунди успеа да оствари победи на гостински терен против Наполи и Рома. Откако го мина Наполи во пенал рулетот, Кремонезе вчера ја совлада Рома на „Олимпико“ и го шокираше Жозе Мурињо, кој по поразот од 2:1 му честиташе на ривалот и нагласи дека тој едноставно нема тим кој може да се бори на повеќе фронта. – Прво и основно, честитки до Кремонезе. Тие остварија две големи победи на турнирот досега и заслужено се во полуфиналето. Го победија Наполи, а сега не победија и нас. Ние одигравме ужасно прво полувреме, не можеше полошо од тоа. Потоа, во вториот дел бевме подобри, но една индивидуална грешка направи да примиме гол. – По 0:2 имавме добра реакција, но тие се бранеа со многу играчи во својата половина и успеаја да издржат. Со малку среќа, можевме да постигнеме гол порано и да се вратиме во мечот, но тоа е што е. Со текот на годините, научив да не плачам после пораз и да гледам на следниот меч. – Што се однесува до мојот тим, ние едноставно не можеме да ротираме и имаме потешкотии кога играме на секои три дена. Бев горд на мојот тим по поразот од Наполи, но тоа не можам да го кажам сега. Јас не сакав да ротирам, но морав да изберам. Лекарите ми порачаа дека има играчи кои се под ризик. Ако стартував со Дибала, ризикував да не сметам на него наредниот месец. Не се работи за ротација, едноставно играчите се под ризик од повреда и мораше да биде така, – изјави Мурињо.