Фото и Видео Милевски: Покажавме дисциплина и карактер, сега ни следи најтешкиот меч 22.03.2025 Март сабота 0-3 резултат за Македонија против Лихтенштајн

22.03.2025 Mart Sabota

Со убедлива победа на гостински терен македонската фудбалска репрезентација ги започна квалификациите за Светското првенство во 2026 година. Победата над Лихтенштајн во Вадуц со 0-3 (0-2) ги задоволи фудбалските вљубеници, а и селекторот Благоја Милевски.

На официјалната прес-конференција македонскиот селектор рече:„Честитки за моите фудбалери, посебно што играа под овие околности и смогнаа сили и карактер. Го изнесоа натпреварот на најдобар можен начин. Очекувавме компактен и организиран Лихтенштајн. Ги анализиравме детално, гледавме 7-8 нивни натпревари, посебно ремито во Букурешт против Романија. Максимално бевме подготвени, и тактички и физички. Фасцинирам сум од поддршката и голема благодарност до сите наши луѓе кои дојдоа од цела Европа. Сплотени сме и фановите ни даваат позитивен сигнал и за иднина. Искрено, не ни беше битна разликата, туку трите бода. Имавме други оптеретувања, но најголемата придобивка се трите бода и менталната реакција. Серафимов го извадив од игра заради жолтиот картон, имаме одредени проблеми со повреди, како Исник Алими, кој доби удар во зглобот. Верувам дека сите ќе бидеме здрави за натпреварот во вторник. Ни следи поинаков натпревар и поинаков тип на противник и веќе мислиме на Велс. Мислам дека ова ќе ни биде најтешкиот натпревар во квалификаците. Задоволен сум од дисциплината и карактерот. Момците од сите аспекти задоволија и планот е исполнет. Ова е ростер од околу триесеттина момци и без разлика на нивната минутажа во клубовите, момците секогаш играат максимално за репрезентацијата.На крај сакам да им честитам и на нашите противници за коректниот однос и прифесионалноста“, заврши Милевски.

Македонија попладнево ја запиша единаесеттата победа во дванаесет меѓусебни натпревари против Лихтенштајн.