Милевски: Медицинскиот тим ќе ја одреди стартната постава

Македонската фудбалска репрезентација ќе брка три бода и победа на гостувањето во Та Кали, каде утре ќе се игра квалификацискиот меч од шестото коло против селекцијата на Малта.

Македонија победи на првиот меч во Скопје со резултат 2:1 и влегува како фаворит во овој дуел, но Благоја Милевски е свесен дека Малтежаните ни направија големи проблеми на „Тодор Проески“, па очекува силен отпор и утре.

Селекторот вели дека мечот со Италијанците е архивиран и оставен зад нив, бидејќи сега следи најважниот натпревар за Македонија во овој квалификациски циклус.

– Италија ја оставивме зад нас и веднаш по завршувањето на мечот ги почнавме подготовките за Малта. Малта и во Скопје ни покажа дека е квалитетна и организирана селекција.

– Играат борбено и агресивно и ни направија проблеми во Скопје. За жал, утре нема да сметаме на Димитриевски. Плативме данок за теренот во Скопје, но верувам во Шишковски и сите кои се тука. Лекарскиот тим ќе го има последниот збор за стартната постава, тука се и Адеми, Несторовски, Трајковски и Велковски, – изјави Милевски.