Милевски: Велс е можеби најсериозен ривал откако сум селектор! Фудбал Македонија -Велс на стадион Тодор проески во Скопје Македонија на 25.03.2025 Март Вторник

Репрезентацијата на Македонија во рамките на второто коло од квалификациите за Светското првенство ќе ја дочека селекцијата на Велс. Оваа островска репрезентација доаѓа во Скопје со фаворитска улога, а нашите фудбалери ја дочекуваат во одлична форма и добра серија.

На прес-конференцијата пред натпреварот своите очекувања ги изнесе селекторот Благоја Милевски.„Велс е анализиран не само од вчерашниот натпревар, туку на сите средби. Мислам дека сме подготвени, треба да бидеме совршени на тактички план и во тркачкиот дел и секако мора да бидеме максимално фокусирани ако сакаме да се надеваме на позитивен резултат. Првично Ристовски и Ќамили нема да бидат во комбинација, а веројатно и Ашковски не е подготвен да одговори на предизвикот. Имаме и други поситни проблеми, ама се надевам сите ќе бидат во ред по тренингот. И пред мечот со Лихтенштајн и сега, емоциите се тука, мислам дека самата подготовка за овие натпревари е посебна тешка за мене и фудбалерите. Од тој аспект и изјавив по првиот меч дека не очекува можеби најтешкиот натпревар во групата. Околностите за жал се тие, се надевам дека никогаш повторно нема да се соочиме со такво нешто. Сакаме на еден начин да се оддолжиме за жртвите и да го израдуваме овој народ со победа.Ние не сме фаворити. Според ранкингот и квалитетот на Велс и играчите, се работи за противник кој има премиерлигашки играчи. Од таа гледна точка апсолутно фаворитската улога е кај нив. Сепак, во спортот не секогаш фаворитите победуваат. На нас е да бидеме максимално подготвени, а колку ќе успееме до позитивен резултат ќе видиме. Велс е можеби најсериозен противник откако сум досега на кормилото на А-репрезентацијата. Ова е компактна селекција, тркачки совршена, технички многу унапредена и не очекува сериозен тест. Како ќе одговори Македонија, ќе видиме. Сега ќе играме со различен противник од саботата. Различен тип на фудбалери, поставеност и се надевам дека ќе одговориме на предизвикот“, изјави Милевски.

Натпреварот меѓу Македонија и Велс ќе се одигра во вторник во 20:45 часот. Се очекува на трибините на Националната арена „Тодор Проески“ да има околу 20.000 навивачи.