„Матица“: „Италијанската девојка“ на Лусинда Рајли најбарана книга за 2022

„Италијанската девојка“ од Лусинда Рајли е најбараната книга за 2022 година, велат од издавачката куќа „Матица“. Се работи за семејна сага која го привлече вниманието на читателите.

„Росана има само единаесет години кога се запознава со Роберто во кафеаната на своите родители во Неапол. Таа се вљубува во убавиот оперски пејач и се заколнува дека еден ден ќе се омажи за него. И Роберто не останува рамнодушен на нејзиниот ангелски глас. Ѝ предвидува блескава иднина и ја убедува да оди на часови по пеење. Благодарение на својот беспорен талент, Росана освојува стипендија за музичката школа во миланската „Скала” . Наскоро патот повторно и се вркрстува со патот на Роберто. Заедно ги освојуваат сцените на најпознатите оперски куќи во светот. Нивната љубов е опсесивна, но и разорна, обележана од лаги и предавства…“. По оваа книга следува трилерот „Последниот преживеан“ од Тес Геритсен. На трето место е „Клетва“ од Јелена Бачиќ Алимпиќ, најпознатата српска авторка и новинарка. Следува „Флертот низ призмата на стручњакот“ од Андреј Курпатов, најпознатиот руски психолог, кој ги разоткрива тајните на личниот и на професионалниот успех. На петтата позиција е „Море на загубената љубов“ од Санта Монтефjоре. Станува збор за романтична и напната приказна за семејните тајни и за победата на љубовта, инспирирана од мирисите и звуците на Италија.

Кај тинејџерите популарни се доживувањата на Нарнија, „Сребрениот стол“, „Коњот и неговото момче“, како и „Господарот на прстените“.