Манчестер Сити ја потврди разделбата со Марез

Манчестер Сити денеска го потврди заминувањето на Ријад Марез, со што и дефинитивно Алжирецот ќе стане член на Ал Ахли.

32-годишниот фудбалер е уште една премиерлигашка ѕвезда која заминува во Саудиска Арабија, а европскиот првак ќе заработи 30 милиони фунти од овој трансфер.

Пеп Гвардиола сакаше да го задржи Марез, но самиот фудбалер донел одлука за разделба и инсистирал да се пресели во Ал Ахли, каде ќе му биде соиграч на нашиот репрезентативец Езѓан Алиоски.

Сити плати 60 милиони фунти за Марез во 2018 година, а оттогаш тој беше еден од најважните играчи на англиската екипа, во чии редови постигна 15 голови последната сезона.

Ал Ахли претходно од Премиер лигата ги доведе Едуард Менди и Роберто Фирмино.