Македонските херои тргнаа за Порто: За три дена на исто место да славиме нова фудбалска историја! (Ф

28.03.2022 Mart Ponedelnik

Македонските херои тргнаа за Порто: За три дена на исто место да славиме нова фудбалска историја! (Фото)Македонската фудбалска делегација ова попладне пристигна со автобус на скопскиот аеродром, од каде следи чартер лет до Порто, градот кој во вторник ќе биде домаќин на бараж финалето за пласман на Светското првенство.

Нашите репрезентативци се на само 90 минути од нова фудбалска историја и пласман на најважниот и најголемиот фудбалски турнир, а во Португалија патуваат со огромна самодоверба по подвигот кој го направија пред неколку дена.

„Рисовите“ ја шокираа Италија среде Палермо и победата од 0:1 ги однесе во големото финале во плејофот, во кое избраниците на Милевски влегуваат со верба дека ќе остварат нов голем резултат.

Најавите од играчите се исти како пред натпреварот на „Ренцо Барбера“, самите велат дека се подготвени да изгинат на теренот на „Драгао“, па сите искрено се надеваме дека ќе ги пречекаме на истото ова место во среда по остварена победа.

Македонија вечерва ќе пристигне во Порто, утре ќе го одржи првиот тренинг на португалско тло, а во вторник во 20:45 ќе ги одмери силите со селекцијата која важи за голем фаворит во финалната пресметка.