Македонскиот игран филм „Мементо“ пред хрватската публика

Девет дена по прикажувањето на филмот „Мементо“ во престижниот њујоршки Музеј на современа уметност МоМА, а по серијата негови европски проекции, невладиното здружение Хрватско-македонска тангента организира проекција во Шибеник, на 20 септември

Во мултимедијалната сала на Градската библиотека „Јурај Шижгориќ“ во Шибеник, утре, на 20 септември (среда), во 18:30 часот ќе се одржи свечена проекција на македонскиот игран филм „Мементо“ (1967). Главните улоги ги толкуваат Рената Фрајскорн и Стево Жигон, а режијата е на Димитрие Османли.

Овој проект е во организација на реномираното здружение Хрватско-македонска тангента. На гостите со неколку збора ќе им се обратат претседателот на Хрватско-македонска тангента, Сашо Георгиевски и еден од најискусните македонски политичари, Тито Петковски, експретседател на Собранието на Република Македонија.

На 11 септември, „Мементо“ беше официјално прикажан во престижниот МоМА, Музејот на современа уметност во Њујорк, во програма посветена на југословенските авторски филмови од 1960-тите. Пред тоа, „Мементо“ ја имаше својата „втора премиера“, односно премиерна проекција на дигитализирана копија од филмот како дел од програмата на третото издание на „Сезона на филмски класици“ – проект на Европската асоцијација на кинотеки (ACE – Association des Cinémathèques Européennes), финансирана од програмата МЕДИА на Европската комисија, заедно со серија проекции во европските филмски центри.

Набргу по онаа во Шибеник, ќе се одржи проекција во Кинотеката во Мадрид. Неодамна филмот беше прикажан и во Културно-информативниот центар на градот Загреб.

Инаку, на страницата МоМА, за „Мементо“ на Османли пишува дека „…филмот е за совеста и се карактеризира со една од најдобрите монтажи досега изведени на целулоидна филмска лента“, како и дека силно потсетува делата на францускиот филмски мајстор Ален Ресне.

„Земањето на земјотресот како почетна точка за критички размислувања за прашања како што се холокаустот, нуклеарните катастрофи и Виетнамската војна – ‘Мементо’ е калеидоскоп на 20 век, како и лична потрага по мир во овој турбулентен свет“.

Во трауматскиот дискурс, филмот добива актуелност со новите трагични искуства како што се катастрофалните земјотреси во Турција и во Сирија и последната катастрофа што го погоди Мароко, но и во секој елемент на масовно човечко страдање…

„Мементо“ е вториот игран филм на Османли (1927, Битола – 2006, Скопје), еден од пионерите на македонската кинематографија.

Од Шибеник, ексклузивно за ВЕЧЕР,

Милена ГЕОРГИЕВСКА