Македонија со убедлива победа во Рига се зацврсти на првото место во групата во Фудбал-Лига на нации 2024-2025 фото и видео

10.10.2024 Oktomvri Cetvrtok

Македонската фудбалска репрезентација оствари триумф од 3-0 на гостувањето кај Летонија во рамки на 3.коло во Лигата на нации. Ова беа важни три бода за нашиот тим во битката за освојување на првото место во групата 4 во Лигата Ц.

Јани Атанасов ја најави победата за Македонија во 35.минута по една убава акција што ја почнаа Енис Барди и Елиф Елмас, а Бојан Миовски прекрасно му асистираше на стрелецот на голот.

На стартот на второто полувреме имавме кризен период во играта, а за тоа многу придонесе принудната измена на нашиот стандарден стопер Висар Муслиу. Откако Летонците не искористија две добри шанси за израмнување, казнивме на спротивната страна. Лирим Ќамили во 70-тата минута искористи еден кикс во домашната одбрана за да стрела за 0-2.

Точка на победата стави Елиф Елмас во 93.минута откако погоди со силен удар во аголот на летонскиот гол.

Македонија сега има седум бодови од три натпревари во групата 4 и е на првото место без разлика на исходот на дуелот помеѓу Фарски Острови и Ерменија.

За три дена го играме клучниот натпревар во групата и тоа на гости кај Ерменија. Ако победиме и во Ереван речиси сигурно го освојуваме првото место, бидејќи во ноември два пати играме дома и тоа против Летонија и Фарски Острови.