Македонија почнува со подготовки за нови три средби на патот кон СП

30.08.2021 Avgust Ponedelnik

Македонската фудбалска репрезентација денеска треба да го има првиот тренинг пред продолжението на квалификациите за пласман на Светското првенство (СП) в година во Катар. Мечот од четвртото коло во групата Ј, со Ерменија во Скопје, в четврток, (20.45 часот), ќе биде и деби на новиот селектор, Благоја Милевски. Потоа следуваат и средбите со Исланд на гости в недела и со Романија дома на 8 септември. За средбите, Милевски повика 26 фудбалери.

По три кола, Македонија е на второто место во групата со шест бода (победи над Лихтенштајн дома и над Германија на гости), колку што има и Германија. Води Ерменија со девет бода.

На Светското првенство во 2022 година ќе се пласираат победниците на десетте квалификациски групи, како и уште три најдобри селекции од баражот, во кој ќе учествуваат 12 селекции, и тоа 10-те второпласирани во групите и две репрезентации што победиле во своите групи во Лигата на нациите, а не се пласирале на СП низ квалификациите и не се меѓу второпласираните во групите.

Македонија и Ерменија досега 10 пати се сретнале меѓу себе (во квалификации за светските првенства, за европски првенства и во Лигата на нации), двете селекции имаат по четири победи, со идентичен ефект на свој терен (по три победи и по едно реми и пораз).

Во квалификации за мундијалите, Македонија победи во двете одиграни средби со Ерменија (за СП 2006), а двете репрезентации играа меѓу себе и во двете изданија на Лигата на нациите (во 2018 и во 2020 година) и забележаа по две победи. Фудбалската федерација на Македонија (ФФМ) ги пушти во продажба влезниците за средбите со Ерменија и со Романија, по цена од 300 денари по меч. Капацитетот на националната арена „Тодор Проески“ е ограничен во согласност со мерките утврдени за заштита од коронавирусот и протоколот на УЕФА за присуство на гледачи на трибините.

Младите ѝ гостуваат на Франција во 1-то коло од квалификациите за ЕП

Неделава и младата репрезентација, за фудбалери до 21 година, почнува со квалификациски циклус, за пласман на Европското првенство (ЕП) во 2023 година во Романија и во Грузија. Во првото коло на групата Х, Македонија ѝ гостува на Франција в четврток, а на 7 септември е дуелот со Србија во Охрид. Во групата се и репрезентациите на Ерменија, Фарските Острови и на Украина. На ЕП ќе се пласираат победниците на деветте квалификациски групи и најдобрата репрезентација меѓу второпласираните, како и четири победници на баражот, во кој ќе играат преостанатите осум второпласирани селекции.