Македонија одигра храбро до последната акција, но започна со пораз на ЕП

13.01.2022 Januari Cetvrtok

Македонската ракометна репрезентација го претрпе првиот пораз на Европското првенство кое ние го стартувавме во Дебрецин, но прикажаната игра и храбриот пристап се причини од кои можат да се извлечат многу поуки за во иднина.

Младите избраници на Кирил Лазаров скапо ја продадоа кожата против фаворизираната Словенија, а дефинитивно беа подобри на стартот кога го изненадија ривалот и поведоа со 4:1. За жал, после ова следеше серија од 6:0 на Словенија и нивна прва поосетна предност на натпреварот, на кој ние во продолжение успеавме уште во три наврати да имаме нерешен резултат.

Тоа се случи во првиот дел кој на крајот заврши со 13:10, а во второто дојдовме до најдобра ситуација кога бевме на само минус еден во последните десет минути кога беше 23:22. Во овој период, големите промашувања на Кузманоски и Пешевски беа казнети од страна на искусните Словенци кои одново отидоа на плус три, што беше клучна разлика за конечна победа од 27:25.

Селекторот Лазаров доби потврда дека има материјал со кој може да работи и овие млади ракометари првпат почувствуваа како е да играат без неверојатниот Кире, кој за наша несреќа се повреди непосредно пред стартот на мечот со Словенија и сигурно е дека ќе го пропушти цело Европско првенство кога е играњето во прашање.

Мартин Томовски со 14 одбрани беше извонреден и ги одржуваше нашите ракометари во игра, додека во нападот се истакна младото крило Кузманоски кое постигна дури осум погодоци, три повеќе од Кузмановски и четири од Филип Талески.

Вториот натпревар на Европското првенство го играме в сабота, а наш противник во втората рунда ќе биде селекцијата на Црна Гора. Македонските ракометари направија неколку грешки во клучните моменти од мечот со Словенија, што се покажа како пресудно за прв пораз на стартот на Европското првенство (27:25). И покрај поразот, позитивните импресии од прикажаното на теренот се одржаа и во микс зоната и на пресот, каде се огласи и селекторот Кирил Лазаров пред македонските новинари, на кои им порача дека е горд на играчите, но и разочаран поради тоа што смета дека денеска сме ја наттрчале Словенија која важеше за голем фаворит. – Јас можам да кажам дека сум горд на моите момци, тоа што одиграа одлично против тим кој поседува ракометари кои играат во најдобрите клубови во Европа, тоа се играчи кои се носители во своите тимови. Треба да сме горди, нас ни се случи тоа што ни се случи, имавме проблеми пред натпреварот, но и покрај тоа дадовме максимум. Разочаран сум, заслуживме барем бод, можеби и два. Спроведовме на терен доста работи коишто ги договоривме, но мислам дека паднавме на искуство. Ги наттрчавме, ги изморивме, но паднавме на искуство. На крајот, дојде до израз искуството на Скубе, Доленец, Благотиншек и останатите. – Мислам дека не верувавме во победата во завршните моменти, пробав да ги убедам во тоа и разочаран сум само поради таа работа. Инаку сум полн со позитивни вибрации, сметам дека сме на прав пат и треба да продолжиеме вака. Да одиграме уште два меча и да чекаме некоја грешка на фаворитите. Најпрво, да ја победиме Црна Гора, натпревар кој ќе биде многу тежок. Секој меч е важен на голем турнир, ќе бидеме се подобри и подобри и сигурен сум во тоа. Дај боже да отидеме во втора рунда, тоа ќе значи уште четири меча, а за овие млади играчи тоа ќе биде огромен плус. На прав пат сме и штета што направивме грешки од недоволна доверба. Играчите дадоа се од себе. – Сега се чувствуваме добро од тоа што го прикажавме, но утре ќе ни биде полошо бидејќи пропуштивме шанси. Бевме блиску, некои одлуки не беа во наша корист. Но, ние сме Македонија, не сме Франција и Данска. Целта е заеднички да го изградиме овој тим. Најважна е Македонија, Македонија е на сите навивачи, да продолжиме со големи настани и верувам дека ќе биде добро. Ќе го зголемиме ростерот во иднина, а сега со срце и глава да ги одиграме наредните два меча, – изјави селекторот Лазаров.